ALMATYDA MÚFTILER ALQASYNYŃ KEZEKTI OTYRYSY ÓTTI

Búgin Almaty Ortalyq meshitinde Bas múftı Naýryzbaı qajy Taǵanulynyń tóraǵalyǵymen Qazaqstan musylmandary dinı basqarmasy janyndaǵy Múftıler alqasynyń kezekti otyrysy ótti.

Basqosýǵa múftııatty ár jyldary basqarǵan Bas múftıler – Rátbek qajy Nysanbaıuly, Erjan qajy Malǵajyuly, Serikbaı qajy Oraz qatysty.

Jıynda QMDB Tóraǵasy, Bas múftı Naýryzbaı qajy Taǵanuly: «Alla qalasa, birer kúnderden keıin Qazaqstan musylmandary dinı basqarmasynyń derbes múftııat bolyp qurylǵanyna 35 jyl tolady. Mereıtoı aıasynda jospardaǵy kóptegen ıgi isterdi ózderińizdiń qoldaýlaryńyzben, jurt bolyp jumylyp, halyq bolyp birigip atqara beremiz. Bárimizdiń maqsatymyz – ortaq, Ahmet Iasaýı babamyz aıtqandaı, Haqqa qyzmet halyqqa qyzmet etýden bastalady. Haqqa da, halyqqa da qyzmet etip jatqan isterimizge Alla mol saýaptan jazsyn! Elimiz aman, jerimiz tynysh bolyp, Alla Taǵala musylman qaýymyn rýhanı alaýyzdyqtan saqtasyn. Ámın!» – dedi.

Májiliste din qaıratkerleri qoǵamda din men dástúr sabaqtastyǵyn nasıhattaý, jastardy destrýktıvti dinı aǵymdardyń ıdeologııalyq yqpalynan saqtandyrý, jamaǵattyń birligin arttyrý syndy máseleler tóńireginde pikir alysty.

​