Үйге кіргенде амандасу әдебі

Сәлемдесу – адамдар арасындағы сүйіспеншілік пен тыныштықты орнататын ұлы исламдық әдептердің бірі. Бұл – жәннат тұрғындарының сәлемі. Алла Тағала мен Оның Елшісі (ﷺ) мұсылмандарға, әсіресе үйге кіргенде, амандасуды бұйырған. Үйге кірген кезде амандасу береке мен тыныштық әкеледі, сондай-ақ отбасы мүшелері арасындағы жылулық пен сыйластықты сақтайды.

Қасиетті Құранда Алла Тағала былай деп бұйырған: «Үйлерге кіргенде, өздеріңе Алла тарапынан берекелі әрі жақсы сәлеммен сәлем беріңдер» (Нұр сүресі, 61-аят).

Пайғамбарымыз (ﷺ) да үйге кіргенде сәлем беруді өсиет еткен. Әнас ибн Мәлік (р.а.) былай дейді: Алланың Елшісі (ﷺ) маған: «Балам, үйіңе кіргенде сәлем бер, бұл сен үшін және отбасың үшін береке болады» – деді (Тирмизи риуаяты).

Егер үйде ешкім болмаса да, сәлемдесу – мұсылман әдебі. Алла Тағала: «Үйлерге кіргенде, өздеріңе сәлем беріңдер» (Нұр сүресі, 61-аят) – деп бұйырған. Бұл аяттың мағынасы – үйге кіргенде амандасу арқылы береке шақырылады.  

Күтпеген жерден кірмеу, есік қағып рұқсат сұрау  
Егер адам өз үйіне емес, басқа біреудің үйіне кіретін болса, алдымен есікті қағып, рұқсат сұрауы керек. Өз үйіне кіргенде де отбасы мүшелерін ескертіп кіргені жөн.  

Үйдегілердің сәлемге жауап беруі
Құранда: «Егер сендерге амандасса, сендер одан да жақсы сәлем қайтарыңдар немесе дәл сондай жауап беріңдер» (Ниса сүресі, 86-аят), – делінген.

Үйге кіргенде амандасудың пайдасы
1. Үйге береке кіреді, өйткені бұл – Алла Елшісінің (ﷺ) өсиеті;
2. Отбасындағы тыныштық пен мейірімділік сақталады;
3. Шайтан үйден алыстайды, өйткені үйге Алланың атымен кірген адамға шайтан жақындай алмайды;
4. Пайғамбардың (ﷺ) сүннетін орындаған болады.

Ерсайын СӘКЕНОВ, «Әзірет Сұлтан» мешітінің ұстазы