TАРАУЫҚ НАМАЗЫ ҚАЛАЙ ОҚЫЛАДЫ?
Пайғамбарымыз (с.а.у.) былай дейді: “Расында Aлла Tағала Рамазан оразасын сендерге парыз қылды. Ал мен оның кешінде қыямды (тарауыхты) сендерге сүннет қылдым. Кімде-кім сеніп және қарымын Алладан күтіп бұл айдың оразасын ұстаса, кештерінде қаим болса (тарауых және басқа намаздарын оқыса), ол күнәларынан aнасы дүниеге әкелген күнгідей тазарады” (Сүнән Нәсаи)
Тарауық намазы Рамазан айына тән, жиырма ракағаттан тұратын сүннет намазы. Бұл намазды Пайғамбарымызбен (с.а.у.) төрт халифа (р.анһум) үзбей оқыған. Тарауықты жамағатпен оқу – сүннет кифая. Мешітте тарауық намазы жамағатпен оқылып жатқанда, себепсіз жамағатты тастап, үйінде оқыған жан абзал істі тастаған болады. Ол үйінде жамағатпен оқыса, жамағат сауабын алады да, мешіттегі жамағаттың сауабынан құр қалады.
Тарауық намазын әр екі рәкағатта бір сәлем беріп, он сәлеммен бітіргеннің сауабы молырақ. Төрт рәкағатта бір сәлем беріп те оқуға болады. (Жамағатта шафиғи мәзһабынан біреу болса, екі рәкағатта бір сәлем беріп оқу керек.)
Тарауық намазы екі рәкағатта бір сәлем берілгенде ақшам намазының екі рәкағат сүннеті секілді оқылады. Төрт рәкағатта бір сәлем беріліп оқылатын болса, құптан намазының төрт рәкағат сүннеті тәрізді оқылады.
Жамағатпен оқылған жағдайда жамағат әрі тарауыққа, әрі имамға ұюға ниет етеді, ал имам дауыстап оқиды. Тарауық намазын дауысы әдемі, тез оқитын емес, қырағат ережелерін жақсы білетін имамның оқытқаны дұрыс.
Кімде-кім имам құптан намазын бітіріп, тарауыққа бастаған кезде мешітке келсе, әуелі құптан намазын оқиды. Сосын тарауық үшін имамға ұяды. Жамағатпен тарауық оқылып біткен соң кем ракағаттарды толықтырады. Сонан соң үтір намазын жалғыз өзі оқиды. Дұрысы сол. Сондай-ақ, үтір намазын имаммен бірге оқыған соң тарауықты аяқтауға да болады.
Тарауық намазын имаммен оқымаған адамның үтір намазын имаммен оқуына болады.
Не имам, не жамағат құптан намазын жамағатпен оқымаған болса, жалғыз тарауық намазын жамағатпен оқи алмайды. Өйткені, тарауықтың жамағаты құптанның парызының жамағатына тәуелді.
Тарауық оразаның емес, уақыттың (Рамазан айының) сүннеті. Орынды себепке байланысты ораза ұстай алмағандар да, тарауық намазын оқуға тиіс.
