МӘШҺҮР ЖҮСІП: КЕДЕЙЛІК ПЕН БЕЙШАРЛЫҚ НЕДЕН ТУАДЫ?

Бұл туралы Мәшһүр-Жүсіп Көпейұлы:

«Бұрынғылар «Кедейлік үш ағайынды болады» деген. Үлкені – кежірлік, ортаншысы – еріншектік, кенжесі – ұйқы. Бұл үшеуі – бірі желкеңнен тартып, бірі құйрығыңды жерге жабыстырып, бірі қисайта құлатып, жібермей жатқан соң, қолың қайда жетсін? Өзіңнен өзің көтіңнен кейін қарай кетіп қор боласың», – депті.

Кежірлік – білгеннің тілін алмайтын, ақылға келмейтін, болар іске мойны жар бермейтін, үнемі сылтау тауып, кері тартатын қыңырлық пен қырсықтық.

Еріншектік - іске құлықсыздық, жайбасарлық, жалқаулық, істі кейінге қалдыра беру. «Еріншектің ертеңі бітпейді» деп бекер айтылмаған.

Ұйқы - бұл жерде көп ұйықтау айтылған. Ұйқы бас, көп ұйықтайтын адам - ойсыз, маубас, сезім-түйсігі таяз болады.

Мәшһүр-Жүсіп Көпейұлы ұсынысы: «Тіл алғыш, елгезек болып үйрен – кежірліктен құтыласың. Тіпті, дәнеме қылмасаң да жаяу аяңдап, олай-бұлай жүріп үйрен – жалқаулықтан құтыласың. Дүние-ақыреттің бірі болмаса, бірінің уайымын ойлап «қалай қыламын, қайтып есебін табамын?» деп ойға түс – ұйқышылдықтан құтыласың. Бұл үшеуінен құтылсаң, қолың әр нәрсеге жетеді!»жоламан бұлан