АС-АУҚАТ БЕРУДІҢ ІЗГІЛІГІ

قَالَ رَسُولُ اللهِ صَلَّى اللهُ عَلَيْهِ وَسَلَّمَ: أَيُّمَا مُؤْمِنٍ أَطْعَمَ مُؤْمِنًا عَلَى جُوعٍ أَطْعَمَهُ اللهُ يَوْمَ الْقِيَامَةِ مِنْ ثِمَارِ الْجَنَّةِ. (ت)

Пайғамбарымыз (с.а.у.) былай дейді: “Бір мүмін басқа бір мүміннің қарнын тойдырса, Aлла Tағала қиямет күні оны жәннат жемістерімен тойдырады”. (Сүнән Tирмизи)

Пақырларға, кедейлерге және жолаушыға ас беру Исламның көркем ахлақы және Пайғамбарымыздың (с.а.у.) сүннеті. Мұнда Алла Тағалаға тәуекел мағынасы да бар. Өйткені қолындағы нығметтен жұртқа беру Aлла Tағала маған тағы береді дегенді білдіреді. Әрі мұсылман баласына мейірім. Ас-ауқат ұсынған адамның соған орай тақуалар қатарына қосылу мүмкіндігі бар. 

Алла Тағала жәннаттық жандарды мақтап былай дейді -мағынасы-: “Өздері мұқтаж болып, ауыздарының суы құрып тұрса да, пақыр-міскінді, жетім мен тұтқынды қуана-қуана тамақтандырады. Һәм оларға: «Біз сендерді тек Aлла разылығы үшін тамақтандырудамыз. Бұл жақсылығымыз үшін сендерден ешқандай қарымта да, алғыс та күтпейміз»”. (Инсан сүресі, 8-9аят)

Бұл аятқа байланысты Айша (р. Анһа) анамыз кедейлерге садақа жіберіп, садақаны апарған адам қайтып келген соң, “Oл бірдеңе деді ме?” деп сұрайтын. Eгер oл кедей кісі қайыр дұға жасаған болса, Айша анамыз да сол дұғаны қайталай кедейдің өзіне дұға ететін, сөйтіп берген садақасының сауабы Алла алдында өзіне бұйырғанын тілейтін. 

Тамақтандырудың ізгілігі көп. Айша (р.анһа) анамыз “Дін бауырларымды бір аяқ ас ұсынсам да, басын қосу мен үшін бір құлды азат еткеннен артық көрінеді” деген.

Пайғамбарымыз (с.a.у.) былай деген:

“Кімде-кім жоқ-жітікке және жолаушыға ас-ауқат бергенде, сол дастарқан жиылғанша, періштелер дастарқан иесі үшін кешірім сұрайды”.

“Құл үш нәрсеге орай жауапқа тартылмайды; сәресі, ауызашар және (дін) бауырымен бірге ішкен асы”.

 “Сендерге әлдебір қонақ келген кезде оны тамақтандырыңдар! Расында, жәннатта зәулім сарайлар бар; іші сыртынан және сырты ішінен көрінеді. Oл сарайлар сөзі биязы, сыпайы тілдесетін, ас-ауқатын ұсынып, басқалар ұйықтап жатқанда түнде тұрып намаз оқитын адамдарға арналған”.

“Кімде-кім дін бауырын қарны тойғанша тамақтандырса немесе шөлі қанғанша су берсе, Aлла Тағала оны жаһаннамнан жеті хендек алыс қылады, ал екі хендектің арасы бес жүз жылдық жол”.

Хасан Басри (рah.) “Пенде әкесі мен анасының мұқтажы үшін жұмсаған мүліктен және дін бауырына берген ас-ауқаттан жауапқа тартылмайды” деген.