«ӘЗІРЕТ СҰЛТАН» МЕШІТІНДЕ ҚАРИЛАРҒА ҚҰРМЕТ КӨРСЕТІЛДІ (ФОТО)

Рамазан айының қасиетті күндерінде «Әзірет Сұлтан» мешітінде тарауық намазын жүргізген қариларға арнайы құрмет көрсетілді.

Астана қаласының және «Әзірет Сұлтан» мешітінің бас имамы Ерболат Жүсіпов қасиетті ай бойы жамағатқа Құран хатым еткен қари-имамдарға қазақы дәстүрмен иықтарына шапан жауып, сый-сияпат жасады.

Айта кетсек, биылғы тарауық намазында еліміздің және шетелдің белгілі қарилары (Садырханов Жұманазар Өсерханұлы, Мухаммад Ибрахим Али Аш-Шабрауи⁠, Әуесхан Нұрболат Нұрбекұлы, Еркінбек Мұсабек Мәдәліұлы) Құран оқып, жамағатқа рухани азық сыйлады. Әрбір тарауық намазынан бұрын жамағатқа насихат айтылып, намаз соңынан ел амандығы мен берекесі үшін дұға-тілектер жасалды.

«Әзірет Сұлтан» мешітінің бас имамы қасиетті айда халыққа қызмет еткен қариларға алғыс білдіріп, олардың еңбегін жоғары бағалады. Мешіт жамағаты да қарилардың еңбегіне ризашылықтарын білдіріп, ыстық ықыластарын жеткізді.

Дереккөз: ҚМДБ Астана қаласы өкілдігінің баспасөз қызметі