ҚАЗАҚСТАН ПАЛЕСТИНАҒА 1 МЛН ДОЛЛАР КӨЛЕМІНДЕ ГУМАНИТАРЛЫҚ КӨМЕК БЕРЕДІ

Бұл туралы бүгін Астана қаласында өткен Түркі мемлекеттері ұйымының Мемлекет басшылары кеңесінің 10-шы отырысында Президент Қасым-Жомарт Тоқаев мәлімдеді.

«Бүгінде Газа Секторындағы бейбіт тұрғындар, әсіресе, балалар және қарттар жанжал азабын шегуде. Олардың қауіпсіздігін қамтамасыз ету – басты міндет. Осы орайда, Қазақстаннан Палестина халқына 1 миллион доллар көлемінде гуманитарлық көмек беру туралы шешім қабылдадым.

Ондаған жыл бойы шешімін таппаған өзекті мәселелерді зорлық-зомбылық көрсету және лаңкестік әдістер арқылы шешу мүлдем дұрыс емес. Қазақстан мұндай тәсілдерді қатаң айыптайды. Ахуал ушығып кетсе, оның салдары тіпті ауыр болуы мүмкін. Бұл ретте кез-келген жанжалды бейбіт келіссөз және дипломатиялық диалог арқылы ғана шешуге шақырамыз» деді Президент.

Дереккөз: Ақорданың баспасөз қызметі