Qyzben júrý kúná ma?

Assalaýmaǵaleıkým! Jasym 25-ke tolyp, úılenýge asyǵyp júrmin. Eki jyldan beri sóz baılasyp júrgen qalyńdyǵym da bar. Úılene qoıaıyn desem, ne jumystyń, ne qarajattyń yńǵaıy keler emes. Eki jyldan beri qyzben júrýim kúnáǵa jata ma?

Ответ

Ýa alaeıkým assalam!

Qyz ben jigittiń aralasýy men júrýine sharıǵat tyıym salady. Óıtkeni, bógde áıel men er kisi ońashalanatyn bolsa, mindetti túrde aralaryna shaıtan kiredi. Ondaı kezde adam balasy nápsisine (shahýatyna) ıe bola almaı qalýy bek múmkin. Jigit pen qyzdyń bulaı júrýi men aralasýynyń sońy zınaǵa alyp barady. Sondyqtan Paıǵambarymyz (s.ǵ.s.) bógde qyz ben ul balanyń ońasha qalýyna tyıym salǵan.

Paıǵambarymyz (s.ǵ.s.) múbárak hadısinde: «Er kisi men áıel ońasha qalmasyn, óıtkeni olardyń úshinshisi shaıtan bolady»[1], – degen. Sol sııaqty Paıǵambarymyz (s.ǵ.s.) bógde áıelge qol berýden de qaıtarǵan: «Sizderdiń bireýlerińiz bógde, ózine halal bolmaǵan áıeldiń qolyn ustaǵannan, basyna temir ıneni qadaǵany jaqsyraq»[2]. 

Taǵy bir hadıste Alla Elshisiniń (s.ǵ.s.) jubaıy Aısha (r.a.) anamyz: «Allaǵa sert, Paıǵambarymyz birde-bir bógde áıeldiń qolyn ustaǵan emes»[3].

Eger sol qyzǵa úılenetin oıyńyz bolsa, kezdeskende qyzdyń janynda mahramy (týys sińlileri nemese qurbylary) bolýy tıis. Ári tek maǵrýf (jaqsy) sózder aıtylyp, ońasha qalýǵa bolmaıdy. Áıtpese, shaıtannyń toryna túsip qalýyńyz múmkin.