Jas jubaılardy qalaı quttyqtaǵan jón?

Assalamý aleıkým! Jaz - qyz uzatý jáne úılený toılary kóbeıetin maýsym. Dostarymyz úılenip, betashar nemese toıǵa barǵanda jastarǵa qalaı tilek aıtqan jón?

Ответ

Ýa aleıkým assalam!

Otaý tigip, shańyraq kótergen jastardy aq nekelerimen quttyqtaý – súnnet amal. Sahaba Ánas (r.a.) rıýaıatynda: «Paıǵambarymyz (s.ǵ.s.) Abdýrahman bın Aýftyń (r.a.) ústinen sarǵylt bir belgi baıqap: «Bul ne?» – dep suraıdy. Ol: «Noqat salmaǵyndaı altyn máhr berip, áıelge úılendim», – dedi. Paıǵambar (s.ǵ.s.): «Alla Taǵala saǵan (áıelińdi) berekeli etsin (Baraka Allahý láká), bir qoı soıyp bolsyn toı jasa»[1], – dedi.

Quttyqtaýda qoldanylatyn taǵy bir tilek tómendegi hadıste aıtylǵan. Ábý Hýraıra (r.a.): «Paıǵambar (s.ǵ.s.) úılengenderdi quttyqtaǵanda «Baraka Allahý láká, ýá baraka aleıká, ýá jamaǵa báınákýmá fı hoır! (maǵynasy: Alla saǵan berekeli etsin jáne bereke jaýdyrsyn, ekeýińniń aralaryńdy jaqsylyqpen qossyn», – dep tilek aıtýshy edi»[2], – dep baıandaıdy.

Hadısterdegi aq tilektermen qatar «Qosaǵyńmen qosa aǵar», «Qondyrǵan qusyń qutty bolsyn!», kelinshekke «Oramal qutty bolsyn!» dep te quttyqtaýǵa bolady.