Jánnattyqtardyń jasy neshede bolady?

Assalamý aleıkým! Jánnatqa kirgen er azamattardyń jasy – 33, al áıelderdiń jasy 18-de bolady degendi estip edim. Osy jaıly Quran jáne hadıste ne aıtylǵan?

Ответ

Ýa aleıkým assalam!

Paıǵambarymyzdyń (s.ǵ.s.) nemereleriniń bir Hasan (r.a.) myna bir oqıǵany rıýaıat etedi:

Bir qart áıel Paıǵambarymyzǵa (s.ǵ.s.) kelip: «Alla Elshisi! Meni jánnatqa kirsin dep duǵa etińizshi», – dep ótinedi. Paıǵambar (s.ǵ.s.): «Ee, Pálensheniń anasy! Jánnatqa qart áıelder kirmeıdi», – dep jaýap qaıtarady. Áıel jylaǵan kúıde tez burylyp ketip qalady. Paıǵambarymyz (s.ǵ.s.) sonda janyndaǵy adamdarǵa: «Álgi áıelge baryp jánnatqa qart kúıinde kirmeıtindigin jetkizińder. Sebebi, Alla Taǵala: Aqıqatynda, Biz olardy basqa jaratýmen jarattyq. Ári olardy er kórmegen pák qyzdar ettik[1], – dep aıtqan[2]».

Demek, jánnatqa er jáne áıelder jas bop kiredi. Al, jasy jaıly Quran Kárimde: «Kúıeýlerine súıikti, qurbylas[3]», – dep aıtylady. Bul aıat: «Kúıeýlerimen bir jasta, otyz úsh jasta bolady[4]», – dep tápsirlengen.

Úmmý Sáláma (r.a.): «Men Paıǵambardan (s.ǵ.s.) Alla Taǵalanyń «Aqıqatynda, Biz olardy basqa jaratýmen jarattyq. Ári olardy er kórmegen pák qyzdar ettik. Kúıeýlerine súıikti, qurbylas», – degen sózi jaıly suradym. Paıǵambar (s.ǵ.s.): «Eı, Úmmý Sáláma! Olar – dúnıede qartaıyp, shashyna aq túsip, kózderiniń nury álsiregen áıelder. Alla Taǵala qart bolǵan áıelderdi kúıeýlerimen teń jastaǵy jas qyzǵa aınaldyrady»,-dep jaýap berdi[5]».

Jáne de Muǵaz bın Jabal (r.a.): «Jánnattyqtar jánnatqa túksiz, saqalsyz jáne kózderi súrmelengen kúıde otyz úsh jasta bolyp kiredi[6]», – degen hadıs rıýaıat etken.

Demek, jánnatta er men áıelder teń jasta bolady. Jánnattyqtar jasy – 33 jas.

[1] Ýaqıǵa súresi, 35-36 aıattar
[2] Tırmızı
[3] Ýaqıǵa súresi, 37-aıat
[4] Sofýat Tafasır, 3-tom, 309-bet
[5] Tırmızı
[6] Ahmed, Tırmızı