Jańa qonysqa kirgende ne isteýge keńes beresizder?
Assalamý aleıkým! Jańa úıge kirgen qonys ıeleri shańyraqta bereket bolýy úshin sharıǵat boıynsha qandaı amal jasaǵany durys?
Ответ
Ýa aleıkým assalam!
Jańa qonysqa kirgenimizde aǵaıyn-týystar men kórshi-qolańdy shaqyryp, dastarqan jaıý qazaqı dástúrimiz. Bul sharıǵat boıynsha shaqyrylǵanda barý mustahab bolyp tabylatyn bes toı-tomalaqtyń qataryna jatady. Sharıǵatta bul qonaq asyn ýákıra dep ataıdy. Ýákıra – úı qurylysy bitýine oraı jaıylǵan dastarqan. Sonymen birge, tómendegideı amaldardy jasaǵan jón:
1. Shańyraqqa kirgende duǵa oqý. Hadıste rıýaıat etilgen duǵa mynadaı: «Áýzý bıkálımátıl Láhı át-támmá mın shárrı má holáq» (maǵynasy: Alla jaratqan barlyq maqulyqtardyń zııankesinen Alla Taǵalanyń barsha sózderimen pana suraımyn). Haýlá Hakımqyzy (r.a.) rıýaıat etken hadıste: «Kimde-kim bir úıge kiretin bolsa, «Áýzý bıkálımátıl Láhı át-támmá mın shárrı má holáq» dep aıtsyn. Mine, sonda ol jerden kóship ketkenshe eshbir zııandyq kórmeıdi[1]», – dep aıtylǵan.
2. Baqara súresin oqý. Ábý Hýraıra (r.a.) rıýaıat etken hadıste: «Úılerińdi beıit sııaqty etip jibermeńder. Shyndyǵynda, Baqara súresi oqylǵan shańyraqtan shaıtan qashady[2]», – dep aıtylǵan.
3. Tańerteńgilik jáne keshki duǵalardy oqyp júrý;
4. Amanshylyq bolsyn ári túrli zııankesten saqtasyn degen nıetpen sadaqa berý jáne nyǵmetter úshin Jaratqanǵa shúkirshilik etý.
