JYLDYQ ESEP-2024: 201 073 SURAQQA JAÝAP BERILDI
QMDB Sharıǵat jáne pátýa bóliminiń mamandary jyl basynan beri elimiz boıynsha 201 073 suraqqa jaýap berdi.
QMDB Tóraǵasynyń orynbasary, Sharıǵat jáne pátýa bóliminiń meńgerýshisi Sansyzbaı Qurbanulynyń aıtýynsha, pátýa mamandary bıyl 46 275 suraqqa jeke kezdesýde jaýap berilse, telefon arqyly 61 643, al áleýmettik jeli qoldanýshylarynyń 93 155 suraǵyna jaýap berilgen.
Budan bólek respýblıkalyq Dinı aqparat berý ortalyǵynyń mamandary (Call-ortalyq) jyl boıyna 9 778 suraqqa jaýap bergen. Onyń ishinde qulshylyqqa qatysty 5612, otbasyǵa qatysty 962, qaryz ben saýda-sattyqqa qatysty 695, teris aǵymdar jóninde 67, sondaı-aq ózge taqyryptarda 2442 suraq qoıylǵan. Al dinı suraq-jaýap retinde 224 maqala ázirlenip, onyń 127-si fatua.kz pen muftyat.kz saıttaryna, gazet-jýrnaldarǵa jarııalandy.
Elordada Túrki memleketteri múftıler alqasy janyndaǵy Pátýa keńesiniń «Túrki álemi: Pátýa berýdiń ádisnamasy men ereksheligi» I halyqaralyq dóńgelek ústel ótti. Qazaqstan, Túrkııa, Ázerbaıjan, Qyrǵyzstan men Ózbekstan memleketteriniń pátýa mamandary bas qosqan jıynnyń ashylýyna QMDB Tóraǵasy, Bas múftı Naýryzbaı qajy Taǵanuly arnaıy qatysqan bolatyn.
Ǵulamalar keńesinde qabyldanǵan pátýalardy túsindirý boıynsha ımamdarǵa 322 semınar, al meshit jamaǵatyna 3387 pátýa saǵaty uıymdastyryldy.
Sondaı-aq sharıǵat jáne pátýa mamandaryna otbasy quqyǵyna qatysty 376 ótinish túsip, onyń barlyǵy oń sheshimin tapty. Ǵulamalar keńesine usynylǵan pátýalar sany – 18, telearnalarǵa berilgen suhbattar sany – 67. Al medıa jospar boıynsha suraq-jaýap retinde 980 vıdeo túsirildi.
