Jastar saıasatyna qatysty jaıttar talqylanǵan sektsııalyq otyrystar bastaldy (FOTO)
Elorda tórinde Eýrazııa keńistigindegi elderdiń din ǵulamalarynyń basyn qosqan «Rýhanı Jibek joly. Islam jáne jastar: qazirgi zamannyń syn-qaterleri» atty IV Halyqaralyq dinı-ǵylymı konferentsııa aıasynda sheteldik dinbasshylarynyń qatysýymen sektsııalyq otyrystar óz jumysyn bastady. Jas urpaqty destrýktıvti aǵymdardyń yqpalynan saqtandyryp, durys dinı aqparatpen qamtamasyz etý, dinı Ekstremızm men terrorızmniń aldyn alý maqsatynda ótip jatqan aıtýly basqosýdyń alǵashqy otyrysy «Musylmandar dinı basqarmasyndaǵy jastar saıasaty: teorııa jáne praktıka» taqyrybyna arnalyp, sheteldik jáne elimizdiń kórnekti din ǵalymdarynyń tushymdy baıandamalarymen tolyǵa tústi. Kórshiles memleketterdiń din qaıratkerleriniń kúshin biriktirip, tájirıbe almasýǵa, jahandyq dinı máselelerdi sheshýde jańa ádis-tásilderdi usynyp, ultaralyq, konfessııaaralyq dıalogty nyǵaıtýǵa baǵyttalǵan 1-sektsııa otyrysynda túrli taqyryptarda baıandamalar jasalyp, arnaıy beınerolıkter kórsetildi.
QMDB Halyqaralyq qatynas jáne hattama bóliminiń meńgerýshisi Ershat Ońǵarov jáne Fınlıandııa Islam uıymynyń ımam-hatyby Ramıl Belıavtyń moderatorlyǵymen ótken sektsııalyq otyrys aıasynda kórshiles elderdiń jastar saıasatyna qatysty jumys tájirıbelerimen bólisip, ortaq yntymastyqqa úles qosa tústi. Otyrys barysynda Halyqaralyq konferentsııa jumysyna arnaıy shaqyrylǵan Qyrǵyzstan Prezıdenti janyndaǵy sarapshylar keńesiniń múshesi, «Din, quqyq jáne saıasat» taldamalyq ortalyǵynyń dırektory Malıkov Kadyr, Máskeý qalasynyń múftıi Ildar Alıaýdınov, Tashkent ıslam ýnıversıtetiniń rektory Gafýrov Ýıgýn, «Nur Múbárak» Egıpet ıslam mádenıeti ýnıversıtetiniń rektory, doktor Muhammed Shahat ál-Jındı, «Qazaqstan dintanýshylar sezi» qoǵamdyq birlestiginiń tóraǵasy Satershınov Baqytjan, Islam mádenıetin, ǵylym men bilim berýdi qoldaý qorynyń úılestirý ortalyǵynyń jetekshi sarapshysy Albogachıev Magomed-bashır jáne «Iassaýı» ǵylymı-zertteý ortalyǵynyń dırektory, professor Dosaı Kenjetaı mazmundy baıandamalar jasap, alqaly jıynnyń salmaǵyn arttyra tústi.
Kórshiles elderdiń din ǵulamalary túgel bas qosqan Halyqaralyq konferentsııa jumysy aıasynda budan bólek eki sektsııalyq otyrys ótip, jastar taqyrybyna qatysty kúrdeli jaıttar talqylana túsetin bolady.
