JAMAǴATQA MARQUM ABSATTAR SMANOV AÝDARǴAN QURAN KÁRIM TANYSTYRYLDY (FOTO)

Búgin, qasıetti juma kúni Astana qalasyndaǵy «Áziret Sultan» meshitiniń jamaǵatyna belgili din ǵalymy, marqum Absattar Smanovtyń «Quran Kárimniń qazaqsha maǵynasy jáne túsinigi» kitaby tanystyryldy. Juma namazynan soń qala bas ımamy Erbolat Júsipov jamaǵatqa marqum Absattar Smanovtyń ónegeli ómiri men artyna qaldyrǵan mol murasy jaıynda aıta kelip, eńbektiń jaryqqa shyǵýyna muryndyq bolǵan Ábjappar Smanovqa sóz berdi.

Aıta keteıik, atalmysh eńbektiń jaqynda ǵana Qazaqstan musylmandary dinı basqarmasynda arnaıy tusaýkeser rásimi ótip, Bas múftı Naýryzbaı qajy Taǵanuly jyly lebizin bildirgen bolatyn.

Marqumnyń aǵasy Ábjappar Smanov jamaǵatqa «Quran Kárimniń qazaqsha maǵynasy jáne túsinigi» kitabynyń jazylý jáne jınaqtaý tarıhyn baıandap berdi. Shara sońynda meshit jamaǵatyna, aqsaqaldar qaýymyna óz qolymen atalmysh Quran kitabyn syıǵa úlestirdi.