Vıtse-mınıstr Ǵulamalar keńesinde ǵalymdarmen suhbattasty (FOTO)

Búgin Qazaqstan Respýblıkasynyń Qoǵamdyq damý vıtse-mınıstri Berik Aryn Astana qalasynda ótken Ǵulamalar keńesiniń HHI májilisine qatysyp, ǵalymdarmen suhbattasty.

Basqosýda din qyzmetkerleriniń bilimin jetildirý, dinı baǵytta bilim alǵysy keletin azamattardy shetelde emes óz elimizde oqytý, destrýktıvti aǵymnyń arbaýyna ilisken tulǵalarǵa qatysty ońaltý jumystaryn jandandyrý, ońaltý sharalary boıynsha qyzmet etetin bilikti mamandar sanyn arttyrý, jamaǵatty birlik pen ıgilikke úndeý, olardyń arasynda túsindirý jumystaryn júıeli júrgizý, t.b. máseleler jan-jaqty sóz boldy. Sonymen qatar, ońaltý jumystaryn jetildirý úshin arnaıy ádistemelik qural ázirleý jaıy sóz boldy. Osy rette Ǵulamalar keńesi janynan jumys toby qurylatyn boldy.

Kezdesýde vıtse-mınıstr Qazaqstan musylmandary dinı basqarmasynyń dinı saladaǵy qyzmetin jańǵyrtý baǵytynda usynys-tilekterin jetkizdi.

«Ǵulamalar keńesi osyǵan deıin múftııattyń kontseptýaldyq qujattaryn, ártúrli ózekti oqıǵalarǵa oraı Dinı basqarmanyń ustanymyn aıqyndaıtyn málimdemeler men 100-ge jýyq pátýalar qabyldady. Keńestiń áleýeti kún sanap artyp keledi. Múftııattyń negizgi jumys baǵyty pátýa shyǵarý, azamattardyń dinı suraqtaryna jaýap berý bolǵandyqtan, bul saladaǵy qyzmetimizdi únemi jetildirip otyrýymyz tıis», – dep atap ótti Serikbaı qajy Satybaldyuly.

Basqosý barysynda kóterilgen máseleler tóńireginde QMDB Apparat basshysy Ǵylymbek Májıev, «Nur Múbárak» ýnıversıtetiniń prorektory Qaırat Qurmanbaev, QMDB-nyń Mańǵystaý oblysy boıynsha ókil ımamy Smaıyl Seıitbekov, belgili teolog-ǵalym Muhan Isahandar óz pikir-paıymdarymen bólisti.