Táýelsizdik merekesi qutty bolsyn!

Táýelsizdik kúni – elimiz úshin ózge meıramdardan mártebesi bıik, mańyzy tereń, qadir-qasıeti mol mereke. Bul – babalar ańsap ótken, jolynda jany qurban bolǵan, uly kún. Áýeli álemderdiń Rabbysy Alla Taǵalanyń qazaq halqyna sheksiz meıirim-shapaǵatynyń arqasynda bul kún bizge baq bolyp buıyrdy. Táýelsizdigimizdiń syndarly jyldarynda eldigimiz nyǵaıyp, tórtkúl dúnıe baǵalaǵan memleketke aınaldyq.

Bul kún halqymyzdyń bolashaqqa degen úmit otyn jaǵyp, elimizdi álemge tanytqany úshin, «qazaq» degen ataýǵa jan kirgizip, ómirimizdi baqytty etýimen asa mańyzdy, erekshe qymbat. Táýelsizdigimiz – azattyqtyń altyn dińgegi, ulttyq órleýdiń uly kúshi. Táýelsiz eldiń uly – qaıratty, qyzy – ıbaly, halqy – qaharman. Til men dildiń, salt-sana men dástúrdiń myzǵymas tiregi de – táýelsizdik! Táýelsizdiktiń arqasynda eldigimizge qut qonyp, yrys úıirildi.

Táýelsizdiktiń qadir-qasıetin Quran Kárimde baıandalǵan myna bir aıattan aıqyn ańǵarýǵa bolady. «Alla senderge beıbitshiliktegi jaıbaraqat bir kentti mysal etti: Oǵan ár taraptan mol rızyq kelýshi edi. Aqyrynda, Allanyń nyǵmetine qarsy keldi (ıaǵnı, beıbitshilik pen rızyq-nyǵmetine, Allanyń nyǵmetterine kúpirlik etti). Sondyqtan Alla olarǵa qylyqtarynyń saldarynan asharshylyq jáne qaýip-qaterdiń tonyn kıdirip, japa tarttyrdy».

Rasynda, oı júgirtken sanaly jan búgingi beıbit zamanymyz úshin, táýelsizdikpen kelgen ıgilikter úshin shúkirlik etýi qajet-aq. Kelesi bar aıatta Alla Taǵala: «Áı, múminder! Allaǵa boı usynyp, Paıǵambarǵa ári ózderińnen bolǵan basshylaryńa boı usynyńdar», – dep bizderge ámir etedi. Áıgili ǵalym Ibn Kásır bul týrasynda: «Anyǵyn Alla jaqsy bilýshi, joǵarydaǵy aıat, kúlli basshylar men ǵulamalardy qamtıdy», – dep túsinikteme bergen eken. Al, Paıǵambarymyz Muhammed (s.ǵ.s.): «Alla sizderdiń úsh amaldaryńyzǵa razy bolady: Birinshisi – Allaǵa ǵana qulshylyq qylyp, Oǵan esh nárseni ortaq qospaýlaryń. Ekinshisi – bútindeı Allanyń jibine (ıaǵnı, dinine) jarmasýlaryń. Úshinshisi – Alla sizderdiń isterińizdi basshylyqqa alýdy násip etken basshylaryńyzǵa keńes berip, shynaıylyq tanytýlaryńyz (basshylarymyzǵa baǵynýymyz qajet)», – dep, óz ósıetterinde basshyǵa baǵynýdy, beıbitshilikti saqtaýdy ámir etedi.

Biz namazda bir ımamǵa qalaı uıyp, sap túzep, baǵynǵan bolsaq, osyndaı beıbit qoǵamdy qalyptastyryp, munaraly meshitterdiń kóbeıýine, azanmen tańdy atyryp, quptandy jamaǵatpen birge aıaqtaýymyzǵa, Qurandy oqýymyzǵa, bilim-ǵylym ıgerýimizge, el men jerge qyzmet qylýǵa qoldaý bildirip otyrǵan basshyǵa baǵyný da basty mindetimiz bolmaq. Óıtkeni, úreı men qaýipke, qorqynysh pen qaterge boı aldyrǵan qoǵamnyń berekesi qashady. Ondaı baqytsyzdyqtan Alla elimizdi saqtaǵaı dep tileımiz.

Endigi bizdiń hám keler urpaqtyń mindeti men boryshy – osy táýelsizdik atty qasterli baqytymyzdy kózdiń qarashyǵyndaı saqtap, tumaryndaı taǵynyp, Otan úshin jan aıanbaı eńbek etip, ter tógý. Elorda rýhanııaty bıylǵy táýelsizdigimizdiń mereıli merekesin úlken jetistiktermen qarsy alyp otyr.

Sol sebepti Táýelsizdik kúni barsha Qazaqstan halqy úshin aıryqsha mereke. Alla Taǵala bizdiń osy baqytymyzdy baıandy, bolashaǵymyzdy mándi, táýelsizdigimizdi máńgi etkeı. Halqymyzdyń yntymaq-birligi arta túskeı. Ultymyzdyń ulyq meıramy – Táýelsizdik kúni qutty bolsyn!