«Taýaf» ishki týrızmdi bastady (FOTO)
QMDB tóraǵasy, Bas múftı Naýryzbaı qajy Taǵanulynyń bastamasymen tarıhı-kıeli oryndarǵa sharıǵat talaby boıynsha durys zııarat jasaýdyń úlgisin kórsetip, nasıhattaý maqsatynda QMDB «Taýaf» týrfırmasy alǵashqy saparyn Túrkistan oblysynan bastady.
Budan buryn elimizde ishki týrızmdi damytý, onyń ishinde tarıhı-kıeli oryndarǵa týr uıymdastyrý qajettigi jóninde Bas múftı bastamasyna oraı QMDB Ǵulamalar keńesinde «Tarıhı kıeli oryndarǵa saıahat jasaýdyń dinı ádebi» atty arnaıy ereje qaralyp, pátýa mamandarynyń qaraýymen bekitilgen bolatyn.
Atalmysh erejeniń negizinde Túrkistan baǵytyna uıymdastyrylǵan alǵashqy saparǵa Shymkent ortalyq meshiti janyndaǵy «Ájeler mektebindegi» analarymyz shyǵyp, týrfırmanyń Shymkent qalasyndaǵy jetekshi ımamdary Azamat Ábdikárimuly men Álimjan Bekboluly sol ájeler tobyna jolbasshylyq etti. Ulttyq naqyshtaǵy kımeshek kıip, saltanaty men sáni jarasqan ájeler toby týrıster men zııaratshylardyń qyzyǵýshylyǵyn týdyrdy.
Din qyzmetkerleri zııarat barysyndaǵy nıet máselesi, sharıǵat talaptaryna qaıshy qatelikterge urynbaý sııaqty máselelerdi aıshyqtap túsindirip, el qurmetine bólengen áýlıe, abyz, ǵulama babalarymyzdyń ómirlerinen ǵıbratty maǵlumattar berdi.
Aldaǵy ýaqytta dinı qyzmetkerlerdiń jetekshiligimen oblystyq, aýdandyq ortalyq meshitter jamaǵaty arasynan tarıhı kıeli oryndarǵa saıahat jasap, zııarat etýdi qalaǵan kisilerge arnaıy týr uıymdastyrýdy Dinı basqarmanyń tól týrfırmasy qolǵa almaq.
