Taldyqorǵanda «Bir kúndik medrese» jobasy bastaldy (FOTO)

QMDB-nyń Taldyqorǵan óńiri boıynsha ókildiginiń uıymdastyrýymen «Bir kúndik medrese» óz jumysyn bastady.

Islam dinin tar uǵymnan aryltý úshin jáne ýaqyt tapshylyǵymen dinimizdiń qundylyǵyn úırene almaı júrgen baýyrlarymyzǵa arnalyp «Bir kúndik medrese" jobasy qolǵa alyndy.

Alǵashqy dáristegi sóz basynda QMDB-nyń Taldyqorǵan óńiri boıynsha ókil ımamy Ardaq Núsiphanuly atalmysh baǵdarlama aıasynda ótetin sabaq barysymen joba qatysýshylaryn tanystyrdy. Arnaıy tirkelýden ótip jınalǵan 70-ten astam tyńdaýshylar legi eki topqa (erler jáne áıelder) bólinip, «Islam dinindegi tazalyq», «Halal jáne haram», «Namaz túrleri» syndy dárister ótkizildi. Aıta keteıik, «Bir kúndik medrese» aptasyna 1 ret ótetin dáris arqyly (jalpy kýrs 4 apta) Islam dininiń negizderin jáne namazdy tolyqtaı úırenýge múmkindik beredi.

Sonymen qatar, kelesi aptalarda ótetin dárister baǵdarlamasynda: Kirispe (meshitpen tanystyrý, termınologııa, Islamdaǵy halal-haram, dáret alý); Namaz sabaq (namaz oryndaý tártibi, súreler, duǵalar); Islam paryzdary (oraza, zeket, qajylyq); Aqıda, senim máseleleri (qarama-qaıshylyq máseleleri); Paıǵambarlar tarıhy sııaqty dárister bolyp ótedi.