ShAǴBAN – ShARAPATY MOL AI

Naýryzbaı qajy TAǴANULY

Qazaqstan musylmandary

dinı basqarmasynyń tóraǵasy, Bas múftı

Qadirli jamaǵat!

Barshańyzdy sharapaty mol Shaǵban aıynyń kelýimen shyn júrekten quttyqtaımyn!

Qasıetti Ramazan aıynyń kelgenin súıinshileıtin Shaǵbanda ár shańyraqqa shattyq, baqyt pen bereke tileımin. Alla Taǵala osy aıda jasaıtyn duǵa-tilekterimizdi, qulshylyq-ǵıbadattarymyzdy qabyl etkeı!

Ardaqty Paıǵambarymyz (oǵan Allanyń salaýaty men sálemi bolsyn) óz úmbetine Shaǵban aıy kirgende tazalanyp, nıetimizdi durystaýdy ósıet etken.

Alla elshisiniń taǵy bir hadıs-sharıfinde aıtylǵandaı, Shaǵban aıynda jasalǵan duǵa keri qaıtarylmaıdy. Endeshe, sharapaty mol Shaǵban aıynda shynaıy nıetpen elimiz ben jerimizdiń ıgiligi úshin kóp duǵa jasaıyq.

Izgi ǵulamalardyń biri: «Erejep – jelge, Shaǵban – bultqa, Ramazan jańbyrǵa uqsaıdy. Erejep aıynda dán egilmese, Shaǵbanda sýarylmasa, Ramazanda qandaı egin kútýge bolady?» degen.

Osy aıda nıetimizdi túzep, múmkindiginshe nápil oraza ustap, duǵa jasap, kóp jaqsylyq jasaýǵa tyrysaıyq. Quran oqyp, qınalǵan jandarǵa, naýqastarǵa, qıyndyqqa tap bolǵan musylmandarǵa Alladan jeńildik, shıpa tileıik.

Alla Taǵala elimizge amandyq, jerimizge tynyshtyq, halqymyzǵa bereke násip etkeı! El irgesin berik etip, Shaǵbannyń sharapatyna bólenýdi, qasıetti Ramazan aıyna aman-esen jetýdi jazǵaı! Ámın!