Serikbaı qajy Oraz Sheshenstannyń múftıimen kezdesti (FOTO)

Qazaqstan musylmandary dinı basqarmasynyń tóraǵasy Serikbaı qajy Oraz Məskeý qalasynda ótken «Islam – meıirimdilik pen beıbitshilik jarshysy» atty halyqaralyq ǵylymı-təjirıbelik konferentsııa aıasynda Sheshenstan Respýblıkasy Prezıdentiniń Keńesshisi, múftı, sharany uıymdastyrýshylardyń biri Salah qajy Mejıevpen kezdesti. Kezdesýge QMDB tóraǵasynyń Birinshi orynbasary, Astana qalasynyń Bas ımamy Naýryzbaı qajy Taǵanuly qatysty.

Resmı basqosýda baýyrlas elderdiń dinı saladaǵy áriptestik baılanysy, yntymaqtastyq aıasyn keńeıtý, din qyzmetkerleriniń áleýetin jan-jaqty kóterý, t.b. máseleler sóz boldy.

Sonymen qatar, Məskeý qalasynda ótken «Islam – meıirimdilik pen beıbitshilik jarshysy» atty halyqaralyq sharanyń maqsaty men mindetteri sóz boldy. Óz kezeginde Bas múftı Serikbaı qajy Oraz aıtýly basqosýdy joǵary deńgeıde uıymdastyrýǵa yqpal etken Salah qajy Mejıevke alǵysyn bildirdi.

Basqosýda taraptar búgingi musylman úmbetiniń birligi, dinaralyq dıalog pen ózara kelisimniń keleshegi, paıǵambarymyz Muhammedtiń (oǵan Allanyń salaýaty men sálemi bolsyn) meırimdilikke negizdelgen joly, t.b. máseleler tóńireginde pikir alysty.

Kezdesý sońynda qos eldiń múftıi baýyrmaldyq baılanysty nyǵaıtý boıynsha kelisim jasap, osy baǵyttarda birqatar ýaǵdalastyqqa qol jetkizdi.