RAMAZAN AIY QUTTY BOLSYN!
Qadirli otandastar!
Barshańyzdy kúlli musylman balasy asyǵa kútetin qasıetti Ramazan aıynyń kelýimen shyn júrekten quttyqtaımyn! Ár shańyraqqa baqyt pen bereke, myqty densaýlyq tileımin!
Sharıǵatymyz boıynsha balıǵatqa tolǵan, aqyl-esi durys árbir musylmanǵa ramazan aıynda oraza ustaý – paryz. Alaıda, jolaýshylar, naýqas jandar men syrqaty asqynyp ketýinen qaýiptengen adamdar, sondaı-aq, júkti nemese omyraýda balasy bar áıelder oraza ustaýdy keıinge qaldyrýyna bolady. Buǵan sharıǵatymyz ruqsat beredi.
Biz talaı syndarly sátterdi bastan keship kele jatqan halyqpyz. Imanymyz ben birligimizdiń arqasynda qıyndyqty eńserip, ósip-óngen elmiz. Allaǵa shúkir, eldigimizdi kórsetip, keshegi «qasiretti qańtar» oqıǵasyn eńserdik. Eki jylǵa sozylǵan pandemııalyq jaǵdaı kezinde de birligimizdi kórsettik.
Alla Taǵala qasıetti Quranda: «Shyn máninde qıyndyqpen birge jeńildik bar» («Sharh» súresi, 6-aıat) deıdi. Mine, búginde qasıetti Ramazan aıynda jamaǵatpen aýyz ashyp, kópshilikpen birge qulshylyq jasaýǵa múmkindik aldyq. Osy kúnge jetkizgen jáne osyndaı uly múmkindikti násip etken Jaratýshy Jabbar Iemizge sansyz shúkirler aıtamyz.
Ramazan – tárbıe men taǵylym aıy. Qasıetti aıda musylman balasy qanaǵat, shúkir, meıirim, baýyrmaldyq, keshirim syndy kórkem minezdi qalyptastyrýǵa tyrysady. Óıtkeni, qasıetti aıda musylmanǵa kóp jaqsylyq pen múmkindikter beriledi. Bul týraly ardaqty Paıǵambarymyz Muhammed (oǵan Allanyń salaýaty men sálemi bolsyn): «Bul aıda jánnat esikteri ashylady. Oraza tutqan adamnyń aldyńǵy jáne keıingi kúnálary keshiriledi», – degen súıinshi habar jetkizgen.
Endeshe, berekeli aıda kóbirek saýapty amal jasaýǵa asyǵaıyq, aǵaıyn. Ata-anamyzdyń, qazynaly qarttarymyzdyń duǵasy men alǵysyn alýǵa tyrysaıyq. Múmkindikke qaraı muqtaj jandarǵa qol ushyn berip, naýqastyń kóńilin surap, saýap alaıyq.
Osy rette kásipker azamattardy qasıetti aıdyń qurmeti úshin halqymyzdyń turmys jaǵdaıyn eskerip, áleýmettik mańyzy bar taýarlar men azyq-túlik baǵasyn múmkindiginshe 10 paıyzǵa deıin tómendetip, jeńildik jasaýǵa shaqyramyn.
Paıǵambarymyz Muhammed (oǵan Allanyń salaýaty men sálemi bolsyn): «Kimde kim baýyrynyń qajetin ótese, Alla onyń qajetinde bolady. Kimde kim musylmannyń bir qaıǵysyn seıiltse, Alla onyń qaıǵy-qasiretteriniń birin seıiltedi», – degen.
Ramazan – Rabbymyzdyń meırim-mahabbatyna bólenetin aı. Berekeli aıdyń bereketinen qur qalmaıyq, halaıyq.Saýaby eselenip jazylatyn aıda árbir izgi amalymyz qabyl bolǵaı. Alla Taǵala ustaǵan orazamyzdy, qoǵam úshin jasalǵan qaıyrly isterimizdi mol saýaptan jazǵaı. Elimiz aman, jerimiz tynysh, táýelsizdigimiz baıandy bolǵaı. Ámın!
Naýryzbaı qajy TAǴANULY
Qazaqstan musylmandary dinı
basqarmasynyń tóraǵasy, Bas múftı
