«Raısa ana» meshitinde qarııalarǵa arnalǵan merekelik kesh ótti (FOTO)

«Qartyn syılaǵan eldiń qazynasy mol». Bul – úlkendi qashanda qadirlep ósken qazaqtyń ustanymy. Ardaqty Paıǵambarymyz (s.ǵ.s.) da: «Qarttarǵa qurmet pen syıapat Alla Taǵalaǵa degen qurmetten týyndaıdy», – degen. Sondaı-aq, Alla elshisiniń (s.ǵ.s.) «Jas adam bir qarttyń jasyna qarap qurmet kórsetse, onyń jasyna jetkende Alla Taǵala oǵan jastardy qurmet etkizedi» degen danalyq sózderi bar.

Eki dúnıe shamshyraǵynyń (s.ǵ.s.) kórsetip ketken osy úlgisi jáne ata-babamyzdan qalǵan taǵylymdy tárbıege saı QMDB Nur-Sultan qalasy ókildigine qarasty «Rahymqyzy Raısa Ana» meshitiniń «Raısa Ana» áıel-qyzdar mektebiniń jamaǵaty keshegi jeksenbi keshinde Qarttar kúnine oraı rýhanı kezdesý ótkizdi.

Jıynǵa elordadaǵy «Sharapat» áleýmettik qyzmet kórsetý ortalyǵynda turyp jatqan zeınetkerler qatysty. Shara shymyldyǵyn qulshylyq ordasynyń azanshysy Ábdýálı Ábjanov Allanyń kálámi, sózderdiń sultany qasıetti Quran aıattarymen ashty.

Basqosýda meshit janynan ashylǵan «Raısa Ana» áıel-qyzdar mektebiniń jamaǵaty oqyp daıyndaǵan Quran hatym duǵasy jasalyp, qarııalardyń dúnıeden ótken ata-babalarynyń rýhyna baǵyshtaldy. Sondaı-aq, shara aıasynda án men jyrdan shashý shashylyp, ata-ájelerge syılyqtar berildi.

Rýhanı kesh sońynda aqsaqal Hasen Moldahmetov jastarǵa aq batasyn berip, meshit jamaǵatyna alǵysyn bildirdi.