QMDB TÓRAǴASY BAS MEShITTE QURAN HATYM DUǴASYN JASADY

Qazaqstan musylmandary dinı basqarmasynyń tóraǵasy Naýryzbaı qajy Taǵanuly Respýblıkalyq bas meshitte jamaǵatpen birge múftııat qyzmetkerleri tolyq oqyǵan Quran hatymnyń duǵasyn jasady.

«Ýa, Jaratýshymyz Alla Taǵala! Osy oqylǵan qasıetti Quran aıattarynyń nurymen halqymyzdy, elimizdi, jerimizdi nurǵa bóleı gór. Halqymyzdy tabıǵı apattardan, zilzaladan, topan sýdan, órtten, keselden, túrli indetterden aman saqtaı kór! Jer betin búlik pen apattan aman etkeısiń. Ýa, Alla! Batys Qazaqstan, Qostanaı, Abaı oblystarynda tasqyn sýdan zardap shekken jerlesterimizge Óziń jar bolǵaısyń. Olardyń basyna kelgen synaqtyń sońyn qaıyrly ete gór. Jerimizdi tasqyn sýdan saqtaı gór» dep duǵa etti Naýryzbaı qajy Taǵanuly.

Bas múftı taraýyq namazyna jınalǵan jamaǵatqa shúkir etýdiń máni men mańyzy jaıly ýaǵyz aıtyp, meshitke jınalǵan qaýymdy el basyna kún týǵanda duǵa etip, qoldan kelgenshe kómektesip, birge bolýǵa úndedi.

​