QMDB: «JAZERA TRAVEL» KOMPANIIaSYNYŃ BASShYSY DINI QYZMETKER EMES
«Jazera travel» kompanııasynyń basshysy Yryskeldi Meıirjan Baýyruly elimizdiń birneshe aımaǵynan júzden asa azamatty umraǵa alyp baramyn dep aqsha jınap, ýádesin oryndaı almaǵan. Meıirjan Baýyruly eshqandaı dinı qyzmet atqarmaǵan jáne meshitte naıb ımam bolyp jumys istemeıdi.
Almaty oblysynyń Ile aýdanyndaǵy «Sábdenuly Ótegen batyr» meshitiniń naıb ımamy Tamashbekov Marselge «Jazera travel» kompanııasynyń basshysy Meıirjan Baýyruly umra saparyna nıet etken jandarǵa dáris ótip berý jóninde ótinish jasaǵan. Naıb ımam dinı qulshylyqty túsindirý maqsatynda ótinishterin qabyl alyp, eki ret sabaq ótkizgen. Dáris sońy suraq-jaýap negizinde jalǵasyp, naıb ımam «Jazera travel» kompanııasynyń qyzmeti jaıly bilgen aqparattarymen de bólisken.
«Jazera travel» kompanııasyna qatysty daýly másele quqyq qorǵaý organdary tarapynan tekserilýde. Naıb ımamnyń atalmysh máselege qatysy bar-joǵy anyqtalý ústinde. Osy rette buqaralyq aqparat quraldary ókilderin tekserilmegen málimetterdi taratpaýyn suraımyz.
Aıta keteıik, sońǵy kezde qoǵamda umra saparyn uıymdastyrýshy keıbir týrfırmalardyń kúmándi is-áreketterine qatysty shaǵymdar kóbeıýde.
Osy oraıda umraǵa baratyn azamattarǵa qyzmet kórsetý, olardyń qaýipsizdigin qamtamasyz etý atalmysh týrfırmalar jaýapkershiliginde ekenin eske salamyz. QR syrtqy týrızmdi retteıtin tıisti zańnamasyna saı umra saparyn toppen uıymdastyrý úshin mindetti túrde memlekettik lıtsenzııasy bolýy tıis jáne ár umra jasaýshyǵa týroperator tarapynan týrkod berilýi qajet. Mundaı talaptar oryndalmaǵan jaǵdaıda umrany toppen uıymdastyrý QR zańdaryna qaıshy.
Osy rette umraǵa aparýshy týrfırmalardyń qyzmetin qadaǵalaýǵa Dinı basqarmanyń zańdy quzireti joq ekendigin jetkizemiz.
Sonymen qatar otandastarymyzdy resmı týroperatorlyq lıtsenzııasy joq týrkompanııalarmen umra saparyna barmaýǵa shaqyramyz.
QMDB Qajylyq bólimi
