QMDB DELEGATsIIaSY – «MEKKE HALAL FORÝMYNDA» (FOTO)

QMDB Tóraǵasy, Bas múftı Naýryzbaı qajy Taǵanulynyń tapsyrmasy boıynsha «Halal Damý» standarttaý jáne sertıfıkattaý mekemesiniń dırektory Aıbek Asqarbekuly men Sharıǵat jáne pátýa bóliminiń mamany Elbek Tasbolatuly Saýd Arabııasynyń Mekke qalasynda «Halal arqyly turaqty damý» taqyrybyndaǵy «Mekke halal forýmyna» qatysýda.

Saýd Arabııasy Koroldiginiń Saýda mınıstri, doktor Majıd bın Abdýlla ál-Kasabı myrzanyń qoldaýymen uıymdastyrylǵan forýmǵa Qazaqstan Respýblıkasynyń Djıdda qalasyndaǵy (Saýd Arabııasy) konsýldyǵy jáne QR Saýda mınıstrliginiń mamandary da qatysýda.

«Forýmnyń negizgi maqsaty – halal standartynyń biryńǵaı júıesin qalyptastyrý arqyly halal ónimderiniń sapasyn arttyrý jáne musylman qaýymyna adal ónim usyný. Bıylǵy forýmǵa 120 eldiń ókilderi, 21 ulttyq saýda-ónerkásip palatasynyń prezıdenti, 180-den astam kompanııa jáne 75 resmı memleket ókili qatysýda. Is-shara barysynda 6000-nan astam kelýshi halal ındýstrııasynyń ózekti máselelerin talqylap, kásipkerlik yntymaqtastyq ornatýǵa múmkindik aldy», - degen Aıbek Asqarbekuly otandyq delegatsııa da tájirıbe almasý maqsatynda forým aıasynda birqatar kezdesýler ótkizip, halyqaralyq áriptestik baılanystardy nyǵaıtý baǵytynda kelissózder júrgizgenin habarlady.

Sonymen qatar, delegatsııa Saýd Arabııasy Koroldiginiń jaýapty organdarymen kezdesip, Qazaqstannyń halal ındýstrııasyn damytýǵa baǵyttalǵan bastamalarmen tanystyryp, tájirıbe almasý múmkindikterin qarastyrýda.

​