QMDB ASTANA QALASY ÓKILDIGINIŃ IMAMDARYMEN ULTTYQ KIIM KÚNI NASIHATTALDY (FOTO)

Búgin Qazaqstan musylmandary dinı basqarmasy Astana qalasy ókildigine qarasty meshit ımamdary men ustazdary 18 naýryz – Ulttyq kıim kúnin atap ótip, atalmysh ıgi bastamany qoǵam arasynda nasıhattady.

Ulttyq oıýlar men áshekeıler arqyly bezendirilgen dástúrli kıim úlgilerin kıip, tól merekeniń shyraıyn ashýǵa úlesterin qosty. Áıelder jamaǵaty da bul sharadan qalys qalǵan joq. Sándi de qarapaıym, qazaqy kórinisterimen berekeli merekeniń sánin kirgizdi. 

Aıta ketsek, búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly din qyzmetkerlerine ótkizgen jınalysta Naýryz merekesin dáripteýge nazar aýdardy.

«Ózderińizge belgili Memleket basshysy Qasym-Jomart Kemeluly Atyraýda ótken Ulttyq quryltaıda Naýryz merekesi men Islam qundylyqtary ózara úndesetinin atap ótti. Prezıdenttiń Jarlyǵymen bıyldan bastap elimizde áz-Naýryzdyń onkúndigi jarııalandy. Búgin, ıaǵnı 18 naýryz – Ulttyq kıim kúni. 19 naýryz – Jańarý kúni. 20 naýryz – Ulttyq sport kúni. 21 naýryz – Yntymaq kúni. 22 naýryz – Jyl basy. 23 naýryz – Tazarý kúni. Biz osy baǵytta aqparattyq, ýaǵyz-nasıhat jumystarynda belsendi jumys jasaýymyz kerek» dedi Naýryzbaı qajy Taǵanuly.