QMDB-30: «Iman» jýrnalynyń shyǵarmashylyq baıqaýy máresine jetti
QMDB-nyń 30 jyldyǵyna oraı «Iman» jýrnaly uıymdastyrǵan «Qazaqstan múftııaty: ótkeni, búgini, erteńi» atty shyǵarmashylyq baıqaý qorytyndylandy.
Shyǵarmashylyq baıqaýǵa elimizge tanymal din ǵalymdary, ıslamtaný ǵylymdarynyń doktorlary, «Nur-Múbárak» ýnıversıtetiniń aǵa oqytýshylary Muhıtdın Isauly men Muqan Isahan, sondaı-aq, ıslamtaný ǵylymdarynyń magıstri, ondaǵan kitaptyń jáne Qurannyń maǵynalyq aýdarmasynyń avtory Sábıt Ibadýlla qazylyq etti.
Qazylar alqasy shyǵarmashylyq baıqaýǵa túsken materıaldardy saralaı kele mynadaı qorytyndy shyǵardy:
Baıqaýǵa nebári jıyrma shaqty materıal túsken. Olar maqala, Esse, suhbat janrlarynda jazylǵan.
Materıaldardyń deni baıqaýdyń sharttary men talaptaryna jaýap bermeıdi. Taqyryp jan-jaqty ashylmaǵan ári tili qarabaıyr,súreńsiz.
Qazylar alqasy materıaldardy iriktep, saraptaı kele birinshi orynǵa laıyqtysy joq dep sheshti.
Ekinshi orynǵa «Sharıǵattan sharapat» atty maqala (avtory – Sulýshash Moldajanqyzy) usynyldy. Ótken ǵasyrdyń toqsanynshy jyldaryndaǵy qoǵamdaǵy dinı, rýhanı jańǵyrý kezeńin qal-qadirinshe qamtyǵan. Bir ımamnyń ómir joly arqyly sol kezdegi elimizdegi dinı ahýaldyń qandaı bolǵanyn oqyrmanǵa jetkizýge tyrysqan. Taqyryp birshama ashylǵan, tili jatyq. Imamnyń qyzmet joly shynaıy beınelengen.
Úshinshi orynǵa «Ustaz» atty maqala (avtory – Oljas Ábdihalyq) laıyq dep tanyldy. Buǵan ustaz men shákirt arasyndaǵy rýhanı baılanys arqaý bolǵan. Ustaz arqyly din qyzmetkeriniń tulǵalyq sıpattaryn ashýǵa tyrysqan. Ustaz ben shákirt arasyndaǵy ózara qurmetke negizdelgen qarym-qatynas qashan da ózekti. Materıaldyń ishinara dıalog arqyly órbýi de onyń utymdylyǵy deýge bolady.
Yntalandyrýǵa úsh maqala usynyldy:
«Ǵıbratty ǵumyr» (Baǵdat Dáýithanuly), «Alǵashqy medrese Merkide ashyldy» (Gúldana Toqbaeva) jáne «Rýhanı orda – múftııat» (Jaıdary Qalıbek).
«Ǵıbratty ǵumyr» atty materıalda dıalog janry sátti tańdap alynǵan. Onda shetelden kelgen qandas baýyrymyzdyń din qyzmetine arnaǵan ómir joly baıandalady. Jas jigit túrli qıynshylyqqa ushyrap, syrqat ekenine de moıymaı din jolynda aıanbaı tabandylyqpen qyzmet etkeni kópshilikke úlgi. Oqıǵa jelisi oqyrmandy qyzyqtyryp, tartady. Qoǵamda jetim balanyń kúıin keship, áleýmettik jaǵynan qaǵajý kórip jatqan ımam-moldalar men olardyń otbasy jáıi áli de ózektiligin joımaı keledi.
«Alǵashqy medrese Merkide ashyldy» atty maqalada Keńes Odaǵy kezeńindegi el musylmandarynyń súreńsiz jáıi men táýelsizdik alǵan soń Dinı basqarmanyń qurylyp, alǵashqy medresesiniń ashylý tarıhy baıandalady. Alǵashqy dinı oqý ornyn ashardaǵy din qyzmetkeriniń qajyr-qaıratyn ashýǵa umtylys bar. Oqıǵalar jelisi shynaıy bolǵanymen, birizdilik baıqalmaıdy.
«Rýhanı orda - múftııat» atty maqalada Dinı basqarmanyń qurylý tarıhyna birsydyrǵy sıpattama berilgen. Ózgelerinen aıat-hadısterdi qoldanýymen erekshelenedi.
Bul materıaldardyń birqatary óńdelip jýrnalymyzda retine qaraı jarııalanady.
