QAZAQSTAN JÁNE ÓZBEKSTAN MÚFTILERI EKIJAQTY BAILANYSTY ARTTYRÝǴA KELISTI
Qazaqstan musylmandary dinı basqarmasynyń tóraǵasy Naýryzbaı qajy Taǵanuly Túrki memleketteri uıymy Múftıler alqasynyń kezekti V májilisi aıasynda Ózbekstan musylmandary basqarmasynyń tóraǵasy, sheıh Nýrıddın qajy Holıqnazarmen kezdesti.
Kezdesýde eki el arasyndaǵy rýhanı baılanysty nyǵaıtýdyń mańyzy sóz boldy. Mártebeli meıman Astana qalasynda Túrki memleketteri uıymy Múftıler alqasynyń kezekti májilisin, sonymen qatar «Qoja Ahmet Iasaýı jáne onyń rýhanı murasy» halyqaralyq ǵylymı-teorııalyq konferentsııasyn joǵary deńgeıde uıymdastyrǵan QMDB Tóraǵasy, Bas múftı Naýryzbaı qajy Taǵanulyna jáne múftııat qyzmetkerlerine aıryqsha alǵys bildirdi. Aıtýly basqosýlar túrki jurtynyń rýhanı tutastyǵyna oń yqpal etkenin atap ótti.
Naýryzbaı qajy Taǵanuly halyqaralyq basqosýda mazmundy baıandama jasaǵan Ózbekstan musylmandary basqarmasynyń tóraǵasy, sheıh Nýrıddın qajy Holıqnazarǵa alǵysyn bildirdi. Kezdesý sońynda taraptar ekijaqty yntymaqtastyqty arttyrýǵa ýaǵdalasty.
Aıta ketsek, Múftıler alqasynda «Islam jergilikti halyq dástúrin qoldaıdy» qujaty men «Fıqh mektebiniń pátýa berýge qatysty» erejesi qabyldanǵan bolatyn.
