Qasıetti juma qaıyrymdylyq jármeńkesimen nurlandy (FOTO)

Kúnderdiń tóresi sanalatyn qasıetti juma qurmetine oraı búgin respýblıkalyq «Áziret Sultan» meshitinde qaıyrymdylyq jármeńkesi ótti. Nur-Sultan ókildigi, Áıel-qyzdar sektorynyń uıymdastyrýymen jaıylǵan jármeńke sóreleri juma namazyna kelgen jamaǵatqa túrli taǵamdar usynyp, saýapqa toly saýda jasaýǵa septigin tıgizdi. Aqpannyń aıazy tońdyrǵan elordalyq jamaǵat jármeńke aıasynda ystyq taǵam men shaıǵa qanyp, meshit ustazdary men shákirtteri ázirlegen túrli táttilerden dám tatty.

Budan bólek, jármeńke sórelerinen ulttyq sýsynymyz qymyz-shubat ta oryn alyp, dinı buıymdar men kitaptar, áshekeıler men dárilik qospalar da saýda kórigin qyzdyrdy.

Aıta keteıik, «Áziret Sultan» meshitindegi qaıyrymdylyq jármeńkesi áıel ustazdary men shákirtteriniń uıytqy bolýymen birneshe jyl boıy turaqty ótip keledi. Elimizdegi pandemııalyq jaǵdaılarǵa oraı keı kezderi jelisi úzilip qalǵany bolmasa, osy ýaqyt ishinde kóptegen jármeńkeler uıymdastyrylyp, jınalǵan qarjy naýqas sábılerge, muqtaj otbasylarǵa jumsalyp kelgen bolatyn. 

Sýretterdi «FOTOGALEREIa» aıdarynan kóre alasyzdar!