Qaraly otbasyǵa «Áziret Sultan» meshitiniń uıymdastyrýymen baspana beriledi (FOTO)

Tilsiz jaýdyń qurbanyna aınalǵan bes perishteniń búgin janazasy shyǵarylyp, deneleri jer qoınyna tabystaldy. Qara jamylǵan otbasynyń qaıǵysyna ortaqtasýǵa jınalǵan Elorda turǵyndary jan-jaqtan janashyr lebizderin bildirip, qoldan kelgen kómekterin kórsetý ústinde.

Qara jamylǵan otbasynyń qaıǵysyn bólisip, janaza namazyn ótkizgen QMDB tóraǵasynyń birinshi orynbasary, naıb múftı Naýryzbaı qajy Taǵanuly sábılerdiń ata-anasyna kóńil aıtyp, sabyrǵa shaqyrdy. Taǵdyr synaǵyna qarsy turarlyq qajyr-qaırat násip etip, qazanyń arty qaıyrly bolýyn tiledi. «Árbir jan – ólimniń dámin tatýshy»[1] ekenin, peshenege jazylǵan taǵdyrǵa sabyrlyq tanytyp, alapat qaıǵyǵa qarsy turarlyq erik-jiger násip etýin surady.

Qabir basynan qaıtyp kelgesin jaıylǵan janaza dastarhany basynda Naýryzbaı qajy Taǵanuly respýblıkalyq «Áziret Sultan» meshitiniń uıymdastyrýymen kópten jıylǵan kómekke búldirshinderdiń ata-anasynyń ótinishi boıynsha páter alyp beriletin jetkizdi. 

Sábılerdiń janazasyna qatysqan Astana qalasy ákiminiń orynbasary Ermek Amanshaev ta jamaǵat aldynda kóńil aıtyp, qara jamylǵan otbasynyń qaıǵysyna ortaq ekendigin jetkizdi. Kópshiliktiń duǵasy qabyl bolyp, qazanyń arty qaıyrly bolýyn tiledi.