QALA BAS IMAMY MEShIT AQSAQALDARYMEN MÁJILIS QURDY (FOTO)

Búgin Astana qalasynyń bas ımamy Erbolat Júsipov «Áziret Sultan» jáne «Ǵylmanı» meshitteriniń aqsaqaldarymen arnaıy kezdesip, taǵylymǵa toly otyrys ótkizdi. Barlyǵy derlik meshittegi Dinı saýat ashý kýrsyn támamdaǵan, búginde qulshylyq ordasynyń ómirinde ózindik orny bar, aýzy dýaly aqsaqaldardyń aq batasyn alyp, kóptegen keleli jaıttardy týrasynda keńesip qaıtty.

Astana qalasynyń bas ımamy Erbolat Júsipov: «Aýylyńda qarııa bolsa, jazyp qoıǵan teń» demekshi, ózderińizdeı kópti kórgen, bilgeni men túıgeni tereń aqsaqaldarymyzdyń arqasynda qazaq qoǵamy qashanda nyq turǵan. Úlkenderdiń batasyn alýǵa asyǵyp, aqylyn tyńdaýǵa yntyq halyqtyń balasymyz. Ózderińizge málim, bıylǵy jyldy Bas múftı Naýryzbaı qajy Taǵanuly bıylǵy jyldy «Islam jáne izgi qoǵam» jyly dep jarııalap otyr. Osy oraıda bıylǵy jumys-josparlarymyzdy, jobalarymyzdy, oıǵa alǵan ıgi ister men irgeli sharalarymyz jaıly sizdermen aqyldasyp, aq batalaryńyzmen bastaýdy jón sanap otyrmyz», – dep, búgingi májilistiń mán-jaıyn túsindirip, aqsaqaldarǵa izgi tilegin bildirdi.

Meshit aqsaqaldary kórsetilgen iltıpatqa rızashylyqtaryn bildirip, aǵalyq aqyl-keńesterin aıtty. Meshit jamaǵaty retinde usynys-tilekterin ortaǵa salyp, qulshylyq ordasynyń jaı-kúıine janashyrlyqtaryn kórsetti.