Qadir túni múbárak bolsyn!

Asa meıirimdi, erekshe qamqor Alla Taǵalanyń atymen bastaımyn!

Túnderdiń tóresi, myń aıdan da qaıyrly Qadir túnine barshamyzdy aman-esen jetkizgen Alla Taǵalaǵa sansyz shúkirler men madaqtar bolsyn! Saýaptar eselenip, duǵa-tilekter qabyl bolatyn múbárak keshti meılinshe qulshylyqpen ásemdep, qaıyrly istermen kórkemdeýdi násip etsin!

Bul tún – asa qadirli tún, óıtkeni arab tilindegi «لَيلَةُ القَدر» sózi: «qadirli tún, qudiretti tún, mańyzdy tún» degen maǵynalardy bildiredi. Bul túnde jaratylystardyń taǵdyry belgilenip, kelesi Qadir túnine deıingi bolatyn (adamdardyń rızyq-nesibeleri, ómir ólshemderi sekildi) mańyzdy oqıǵalar Alla Taǵala tarapynan perishtelerine aıan bolady.

Ramazan aıy kelgende Ardaqty paıǵambarymyz (s.ǵ.s.): «Oraza aıy keldi, onda myń aıdan qaıyrly Qadir túni bar. Kimde-kim sol túnniń saýabynan qur qalsa, barsha jaqsylyqtan maqurym qalmaq. Maqurym adam ǵana onyń saýabynan qur qalady», – dep, bul túnniń  jaqsylyqqa umtylýǵa shaqyrǵan.

Eń keremeti osy túndi myń aıdan artyq etken Qurannyń sol túni túse bastaýynda jatyr. Musylmannyń mindeti – aldymen Quran oqýdy úırenip, odan keıin maǵynasy men tápsirin meńgerip, sol bilgenderimen amal etý. Odan keıin osy aqıqattardy ózgelerge jetkizip, olardyń da týra jolǵa túsýlerine kúsh-qaıratyn jumsaýy qajet.

Qadir túni atyna zaty saı, adamzat balasynyń keleshegi úshin asa qadirli hám mańyzdy. Haq Taǵala adam balasyna shaıtannyń arbaýyna tez kónetin nápsini berik synap, óziniń asa meıirimdiligimen bul tyǵyryqtan sytylyp shyǵatyn dańǵyl joldy da meńzegen.  Ol dańǵyl jol – qasıetti Qadir túni táýbege kelip, yqylasty túrde keshirim surap, jan-tánimen Haqqa jalbarynyp, bolashaǵyna zor úmit artyp, Jaratqannyń jumaǵyna jeteleıtin raqym joly. Laıym, osy jol barsha adamzatqa násip bolǵaı!

Naýryzbaı qajy Taǵanuly

QMDB tóraǵasynyń birinshi orynbasary, naıb múftı,
Respýblıkalyq «Áziret Sultan» meshitiniń bas ımamy.