Óskemende «Óńirlik I áıelder forýmy» ótti (FOTO)
QMDB Óskemen aımaǵy ókildiginiń uıymdastyrýymen Óskemen qalasynda «Rýhanııat - ana sútinen» atty «Óńirlik I áıelder forýmy» bolyp ótti.
Forým jumysyna QMDB tóraǵasynyń orynbasary, naıb múftı Alaý Ádilbaev, «Nur Múbarak» ýnıversıtetiniń rektory, doktor, prefessor Mýhammad ash-Shahhat Abdýlhamıd al-Jındı jáne QMDB nyń burynǵy Bas múftıi Erjan qajy Malǵajyuly haziret, QMDB «Áıel-qyzdar» sektorynyń jetekshisi Aqbópe Qanatqyzy, dintanýshy ǵalymdar, ımamdar, ájeler, óńir boıynsha «áıel-qyzdar» sektorynyń jetekshileri men shákirtter jáne jastar qatysty. Forým jumysy ájelerdiń aq shashýymen bastaldy.
QMDB Óskemen aımaǵynyń ókil ımamy Ermek Qasbolatuly forýmdy ashyp sóz sóılep, bul sharanyń «Áıel-qyzdar» sektorynyń jumysyn serpindi damytýda mańyzǵa ıe ekendigin jetkizdi.
Jıynda naıb múftı Alaý Ádilbaev baıandama jasap, qoǵamdaǵy áıelderdiń roline toqtaldy.«Islamda áıel quqyǵy barynsha qorǵalǵan. Asyl dinimizde analardy ulyqtap, olardyń mártebesin joǵary qoıǵan. Dinimizde anany syılaý, áıelderge, qyzdarǵa qurmetpen qaraý týraly taǵylymdar óte kóp. Islam tarıhynda Aısha anamyz (r.a) qatarly kóptegen uly analarymyzdyń ǵıbratty taǵylymy kúlli musylman balasyna úlgi» deı kele, analar ulaǵatynan mol taǵylym aıtty.
Jıynda «Nur Múbarak» ýnıversıtetiniń rektory, doktor, prefessor Mýhammad ash-Shahhat Abdýlhamıd al-Jındı sóz alyp, ıslamdaǵy áıel mártebesi týraly ǵıbratty oılaryn ortaǵa saldy.
QMDB nyń burynǵy Tóraǵasy Erjan qajy Malǵajyuly haziret jıynnyń mańyzyna toqtalyp, ult tarıhyndaǵy analar ulaǵaty týraly syndarly baıandama jasady.
Sonymen qatar forýmda QMDB «Áıel-qyzdar» sektorynyń jetekshisi Aqbópe Qanatqyzy sektordan atqarylyp jatqan sharalardy aıta kele, ulttyq qundylyqtarmen ana tárbıesiniń taǵylymdyq mán mańyzyn tereńnen tarqatty.
Aıtýly sharada sóz alǵandar qazirgi zamanǵy qyzdar tárbıesi, ulttyq qundylyqtardy ulyqtaý týraly pikirlerin ortaǵa saldy. Jıynda kóptegen syndarly oılar aıtyldy.
Shara barysynda ókildiktiń janynan ashylǵan «Zere Ana» qorynyń sheberhanasynyń jasaǵan ulttyq buıymdarynyń kórmesi ótti. Ájeler áýelete án saldy. Qatysýshylarǵa ókildiktiń ustazy, óńir boıynsha «áıel-qyzdar» sektorynyń jetekshisi Talshyn Qojahmetovanyń kitaby jáne paraqshalar taratyldy.
Ókil ımam Ermek Qasbolatuly: «Osynaý alqaly sharaǵa óńirge qarasty barlyq aýdandardan áıelder qaýymy tabıǵattyń qıynshylyǵyna qaramaı kelip qatysyp otyr. Barlyqtaryńyzǵa alǵys aıtamyn. Bul osy iske degen Sizderdiń yntalaryńyz», – deı kele, barlyq qatysýshylarǵa alǵysyn bildirdi.
