Nur-Sultan ókildiginde birqatar qyzmettik taǵaıyndaýlar boldy (FOTO)
Qazaqstan musylmandary dinı basqarmasynyń Nur-Sultan qalasy ókildigi boıynsha búgin birqatar qyzmettik taǵaıyndaýlar boldy. Shahar bas ımamy Erbolat Júsipov osy oraıda «Ás-Sálam», «Sheıh Kýnta qajy» jáne «Ál-Ǵanı» meshitterinde arnaıy kezdesý ótkizip, meshit ujymyna Bas múftı Naýryzbaı qajy Taǵanulynyń buıryǵymen taǵaıyndalǵan jańa qyzmetkerlerdi tanystyrdy.
Qala bas ımamy aldymen Elorda irgesindegi Temirjolshylar eldimekeninde ornalasqan «Ás-Sálam» meshitiniń ujymymen júzdesip, jańa taǵaıyndaýlar jaıynda málim etti. Atalmysh qulshylyq ordasynyń bas ımamy qyzmetine taǵaıyndalǵan Smaǵulov Dastan Zııashulyn tanystyryp ótti. 2007 jyly «Nur Múbárak» ýnıversıtetin aıaqtaǵan soń «Ekibastuz» qalalyq meshitiniń naıb ımamy bolyp attaı on jyl jemisti qyzmet atqarǵan Dastan Smaǵulov 2017 jyldan beri osyndaǵy «Tólebaı» meshitine qyzmetke aýysqan bolatyn. Úsh jyldan beri tonnyń ishki baýyndaı aralasyp ketken elordalyq áriptesteri jańa bas ımamǵa qurmet tanytyp, sátttilik tiledi.
Sondaı-aq, QMDB tóraǵasy, Bas múftı buıryǵy boıynsha Hýsaınov Ashat Sálimgereıuly «Ás-Sálam» meshitiniń ustazy bolyp taǵaıyndaldy. Elorda jamaǵatyna keńinen tanys Ashat Sálimgereıuly buǵan deıin qalalyq «Ál-Ǵanı» meshitinde ustazdyq qyzmet atqaryp kelgen bolatyn.
«Ás-Cálam» meshitiniń burynǵy bas ımamy Serik Qurmanovqa jamaǵat jáne ókildik atynan alǵys bildirip, Erbolat Nuryldauly bilikti qyzmetkerdiń «Sheıh Kýnta qajy» meshitiniń naıb ımamy bolyp taǵaıyndalǵanyn jetkizdi. Jańa qyzmet ornymen arnaıy tanystyryp, din jolyndaǵy jumysyna sáttilik tiledi. Serik Qurmanov 2001 jyldan bastap Aıyrtaý aýdanynda, Shahtınsk qalasynda bas ımamy, Qaraǵandy ortalyq meshitinde birinshi naıb ımam bolyp jemisti jumys istegen. 2017 jyly «Ás-Sálam» meshitiniń bas ımamy bolyp taǵaıyndalǵan.
Sondaı-aq, búgin qalalyq «Ál-Ǵanı» meshitiniń ujymy da bilikti qyzmetkermen tolyǵa tústi. Bas múftı buıryǵymen «Raısa ana» meshitiniń naıb ımamy Myrzageldıev Hamıt «Ál-Ǵanı» meshitine aýystyryldy. 2010 jyldan bastap dinı salada jumysqa kirisken Hamıt Myrzageldıev buǵan deıin Qaraǵandy oblysynda, Sátpaev qalasynda, Shymkent qalalyq meshitterinde ımamdyq qyzmet atqarǵan.
Sýretterdi «FOTOGALEREIa» aıdarynan kóre alasyzdar!
