Nur-Sultan ókildigi 1 400 otbasyǵa «Ramazan syılyǵyn» tartý etti (FOTO+VIDEO)

Búgin el astanasy Nur-Sultan qalasyndaǵy respýblıkalyq «Áziret Sultan» meshitinde «Ramazan syılyǵy» atty qaıyrymdylyq sharasy ótti. QMDB Nur-Sultan ókildigi uıymdastyrǵan shara aıasynda Elordamyzdaǵy 1 400 muqtaj otbasyǵa ramazan syılyǵy retinde azyq-túlik sómkeleri taratyldy.

Saýapty sharaǵa Nur-Sultan qalasynyń bas ımamy Erbolat Júsipov bastaǵan dinı qyzmetkerler men eriktiler toby, qaıyrymdylyq sharasyna demeýshilik tanytqan «YDA» holdınginiń qyzmetkerleri qatysyp, izgi tilekterin bildirdi. Sondaı-aq, qaladaǵy 12 meshit boıynsha qaıyrymdylyqqa jaýapty qyzmetkerler qatysyp, ár meshit boıynsha taratylatyn azyq-túlik sómkeleri úlestirildi.

«Ramazan aıynyń taǵy bir qyry – qoǵam arasyndaǵy qaıyrymdylyqty kóbeıtip, jomarttyq pen jaqsylyqtar eselene túsetin aı. Ardaqty Paıǵambarymyz (s.ǵ.s.) da dál osy ramazan aıynda erekshe jomarttyq tanytyp, qaıyrymdylyq jasaýǵa kelgende aıryqsha qulshynyspen atqaratyn bolǵan. Sol úshin ramazan aıy bizder úshin qaıyrymdylyq aıy bolýy tıis.

Osy oraıda qasıetti ramazan qarsańynda Bas múftıimiz Naýryzbaı qajy Taǵanuly úndeý jarııalap, múbárak aıda Alla razylyǵyna jeteleıtin ıgi amaldardy kóptep atqarýǵa shaqyrǵan bolatyn. Minekeı, ıgi úndeýge alǵash bolyp ún qosqan «YDA» holdınginiń demeýshiligimen búgin 1400 otbasyǵa qoldan kelgenshe Ramazan meıirin sezindirýge tyrysyp otyrmyz. Alla Taǵala búgingi sharamyzdy qabyldyqqa jazǵaı!» – dep atap ótti Erbolat Nuryldauly.

Sýretterdi «FOTOGALEREIa» aıdarynan kóre alasyzdar!