Nur-Múbarak ýnıversıteti men Ál-Farabı atyndaǵy QazUÝ ózara memorandýmǵa qol qoıdy
Táýelsizdik merekesi aıasynda Nur-Múbarak Egıpet ıslam mádenıeti ýnıversıtetiniń delegatsııasy elimizdegi joǵary bilimniń qara shańyraǵy ál-Farabı atyndaǵy Qazaq ulttyq ýnıversıtetine arnaıy at basyn tiredi. Qurmetti qonaqtardy QazUÝ rektory Ǵalym Mutanov qabyldady. Kezdesý barysynda qos oqý oryn arasyndaǵy yntymaqtastyq qarym-qatynasty tıimdi tarapta damytý máseleleri talqylandy.
Rektor, professor Mýhammad ál-Jındı jańa áriptestikke erekshe yqylasty ekendigin, bul joǵary bilim salasynda ǵana emes, qazaq eliniń damýyna da jemisti jobalar beretindigine senim bildirdi.
QazUÝ rektory Ǵalym Mutanov professor Mýhammad ál-Jındı myrzaǵa óz alǵysyn bildire otyryp ýnıversıtettiń jetistikterimen tanystyryp, «Al-Farabi university smart city», sondaı-aq áleýmettik jobalardyń mańyzdylyǵyn atap ótti.
Ǵalym Mutanov: «Sońǵy jyldary biz ýnıversıtetimizde dintaný jáne ıslamtaný mamandyqtary oqytylyp jatyr. Osy oraıda shyǵystyń uly fılosofy ál-Farabıdiń izgilikti qoǵam týraly ıdeıalaryna negizdelgen ýnıversıtet 4.0 atty joǵary oqý oryndaryn damytýdyń jańa úlgisin qurǵanymyzdy erekshe atap ótkim keledi.Sonymen qatar sońǵy jyldary damyǵan jáne damýshy elder ıslamdyq qarjylandyrý júıesin engizýge belsene kirisýde. Sondyqtan da ıslam bankıngi men ıslam qarjylandyrý salasy boıynsha magıstrlerdi daıyndaýdy da qolǵa alyp jatyrmyz», - dedi.
Nur-Múbarak ýnıversıtetiniń rektory, professor Mýhammad ál-Jındı ýnıversıtet basshylyǵyna alǵysyn bildirip, zamanaýaı damý qatarynda kósh bastap kele jatqan Ulttyq ýnıversıtetke órkendeı berýine tilek bildirdi.
Keleli kezdesý barysynda bilim men ǵylym salasy boıynsha ózara seriktestikti damytý maqsatynda memorandýmǵa qol qoıdy. Estelik syıkádeler jasalyp, sýretke tústi.
