Naıb múftı: orazada avtobýstar tegin tasymaldaıdy (FOTO)

Búgin Elordada ótken baspasóz máslıhatynda Birinshi naıb múftı, Nur-Sultan qalasynyń Bas ımamy Naýryzbaı qajy Taǵanuly qasıetti ramazan aıynda jamaǵatty tegin tasıtyn avtobýstar paıda bolatynyn atap ótti.

«Qala ákimshiliginiń qoldaýymen taraýıh namazdarynan soń tegin qatynaıtyn avtobýstar bıylǵy jyly da jamaǵattyń alǵysyna bólenetin bolady. Avtobýstar baǵyty jaıly aqparattar qosymsha meshitterde habarlanyp, ókildik saıttarynda jarııalanatyn bolady. Sondaı-aq, qala ákimshiliginiń kelisimimen qala kóshelerinde, avtobýs beketterinde ramazan aıymen quttyqtaý lebizder, orazanyń qadir-qasıeti jónindegi ónegeli sózder jazylyp, halyqtyń orazaǵa oń nıetin oıatyp, yqylasyn arttyrý qolǵa alynyp otyr.

Qasıetti Qadir túniniń ereksheligin eskertip, jamaǵatty habardar ete túsý úshin barlyq meshitterde arnaıy baǵdarlama túzilip, ýaǵyz-nasıhat aıtylyp, qulshylyq-ǵıbadatqa erekshe kóńil bólinedi. Osy rette «Áziret Sultan», «Nur Astana» sekildi meshitterde aýlaǵa arnaıy led Ekrandar qoıylyp, ishtegi ýaǵyz-nasıhat jumystary kórsetilip keledi. Osy bastamanyń bıylǵy jyl aıasyn keńeıtip, ózge de meshitterge qoldanýdy jón sanap otyrmyz», – dedi Naýryzbaı qajy Taǵanuly.