Naıb múftı halyqaralyq onlaın-konferentsııaǵa qatysty (FOTO)
QMDB tóraǵasynyń orynbasary, naıb múftı Ershat Aǵybaıuly ultymyzdyń din qaıratkeri, tarıhı tulǵa Beket Myrzaǵululynyń 270 jyldyǵyna arnalǵan «Túrki eline máshhúr tulǵa – Beket ata» atty halyqaralyq ǵylymı-tájirıbelik onlaın-konferentsııaǵa qatysty.
Aqtaýdaǵy Sh.Esenov atyndaǵy Kaspıı tehnologııalar jáne ınjınırıng ýnıversıteti uıymdastyrǵan rýhanı sharada QR Memlekettik hatshysy Qyrymbek Kósherbaev, Mańǵystaý oblysynyń ákimi Serikbaı Trumov quttyqtaý sóz sóılep, Beket ata týraly arnaıy ázirlengen beınerolık kórsetildi.
Budan keıin múıizi qaraǵaıdaı ǵalymdar Dosaı Kenjetaı, Saıat Ybyraı, sondaı-aq, Ózbekstannan arnaıy qosylǵan tarıh ǵylymdarynyń kandıdaty, Hıýa «Ichan-qala» mýzeı-qoryǵynyń ǵalym hatshysy, Túrkııadan tarıh ǵylymdarynyń doktory Áshirbek Mýmınov baıandama jasady. Al óz kezeginde naıb múftı Ershat Aǵybaıuly konferentsııa jumysyna sáttilik tilep, QMDB tóraǵasy, Bas múftı Naýryzbaı qajy Taǵanulynyń quttyqtaý sózin jetkizdi:
«Kıeli Mańǵystaý jaıly syr shertkende rýhanı ustaz, áýlıe Beket Myrzaǵululyna toqtalmaı ketý múmkin emes. Mańǵaz Mańǵystaýǵa taban tiregen adam Beket Ata basyna baryp, zııarat jasaýǵa tyrysady. Beket Ata jer asty meshitine barǵan jandar erekshe áser alyp, rýhanı sýsyndap qaıtady.
Alla sátin salyp, biz de Ata basynda bolyp, aǵartýshy tulǵanyń rýhyna Quran baǵyshtap, erekshe áser aldyq. Biz osy saparda ǵıbrat bolar bir dúnıeni baıqadyq. Pir Bekettiń jer asty meshitinde shákirt tárbıeleýmen qatar, oqshaýlanyp qulshylyq etýi bizdi biraz oılandyrdy. Bul amal musylman balasynyń rýhanı kemeldenýine úlken áser etedi.
Beket Atanyń jer astynda jeke qalyp, qulshylyq amalyn jasaýdaǵy maqsaty – Allany eske alý, sonymen qatar júrekti ártúrli dertten, máselen, dúnıege shekten tys qyzyǵý, rııa, qalaýǵa erik berý, bireýdiń kemshiligine qýaný, maqtan sózge masattaný, t.b. dertten arylý jáne ony emdeý» dep atap ótti.
