Múftııattyń pátýa salasy boıynsha jumysy talqylandy (FOTO)

Nur-Sultan qalasynda Qazaqstan musylmandary dinı basqarmasynyń Sharıǵat jáne pátýa bóliminiń aımaqtaǵy ókilderiniń alqaly májilisi ótti.

Basqosýǵa Bas múftı Serikbaı qajy Oraz, Birinshi naıb múftı Naýryzbaı qajy Taǵanuly, Apparat basshysy Ǵylymbek Májıev, Sharıǵat jáne pátýa bóliminiń meńgerýshisi Sansyzbaı qajy Qurbanuly, QMDB bólim basshylary qatysty.

Alqaly jıynda birizdi pátýa berýdiń mańyzdylyǵy men maqsaty, úkim shyǵarýdyń jaýapkershiligi, pátýa shyǵarý qaǵıdattary, fıqhı zertteý júrgizý ádistemesi, qoǵamdaǵy ajyrasý (talaq) máselelerin sharıǵı turǵyda sheshý tártibi, zeket berýge qatysty máseleler, halal taǵamdy tutynýdyń mańyzdylyǵy, saýda-sattyq pen qarjynyń sharıǵı prıntsıpteri: lızıng, mýrabaha, t.b. taqyryptar tóńireginde máseleler jan-jaqty talqylandy.

Jıynda sóz alǵan Bas múftı Serikbaı Satybaldyuly birizdi pátýa shyǵarýdyń mańyzdylyǵyna toqtaldy.

«Múftııattyń negizgi jumys baǵytynyń biri – dinı tereń máseleler boıynsha pátýa berý. Dinı úkim shyǵarýda birizdilik óte qajet. Bul – jamaǵattyń birligin nyǵaıtatyn faktor», – dep atap ótti Serikbaı qajy Oraz.

Birinshi naıb múftı Naýryzbaı qajy Taǵanuly ýaǵyz aıtýda baısaldy ustanymnyń mańyzdylyǵy, tyńdaýshy jamaǵattyń deńgeıine sáıkes nasıhat aıtý, qoǵam múshelerin dinsizdikte aıyptamaý, QMDB bekitken pátýalardy halyqqa jan-jaqty jetkizý jaıly pikirimen bólisti. Al Ǵylymbek Jádigeruly din taratýda kórkem minez ben kórkem nasıhat qajettigin atap ótti. Bólim meńgerýshileri óz salasy boıynsha dáris júrgizdi.

Kezdesý sońy suraq-jaýapqa ulasyp, túıtkildi máseleler talqylandy.