MIǴRAJ TÚNI MÚBÁRAK BOLSYN!
Naýryzbaı qajy TAǴANULY,
QMDB Tóraǵasy, Bas múftı
Qadirli jamaǵat!
Alla Taǵala Qasıetti Quranda: «Allanyń kókter men jerdi jaratqan kúni jazǵan úkimi boıynsha aılardyń sany – on eki, olardyń tórteýi – haram aılar. Mine, adamzattyń ıgiligi úshin eń durys ári minsiz júıe – osy. Endeshe, bul aılarda óz-ózderińe qııanat jasamańdar» («Táýbe» súresi, 36-aıat) dep eskertedi.
Osy tórt ulyq aılardyń biri – Erejep. Al Erejep aıynyń jıyrma altysynan jıyrma jetisine qaraǵan tún, ıaǵnı Islam tarıhynda oryn alǵan mańyzdy oqıǵa – Mıǵraj.
Osy túndi Jábireıil perishte (oǵan Allanyń sálemi bolsyn) Paıǵambarymyz Muhammedke (oǵan Allanyń salaýaty men sálemi bolsyn): «Ýa, Muhammed, Alla Taǵala eshkimge násip etpegen sharapatty saǵan násip etpek. Seni quzyryna shaqyryp jatyr», – deıdi. Osydan keıin Jábireıil perishte (oǵan Allanyń sálemi bolsyn) ony Haram meshitinen Aqsa meshitine bir sátte alyp keledi. Bul týraly «Isra» súresiniń 1-aıatynda: «Qulyn (Muhammedti) bir túnde Haram meshitinen aınalasyna Ózimiz qut-bereke darytqan Aqsa meshitine keıbir mańyzdy belgilerimiz ben dálelderimizdi kórsetý úshin alyp barǵan Alla – minsiz, pák. Ol shák-shúbásiz bárin estýshi, bárin de kórýshi», – dep baıandalady.
Odan keıin Paıǵambarymyz (oǵan Allanyń salaýaty men sálemi bolsyn) túnniń bir ýaqytynda Aqsa meshitinen aspandaǵy Sıdratýl-múntahaǵa kóterilip mıǵraj jasaǵan.
Paıǵambarymyz (oǵan Allanyń salaýaty men sálemi bolsyn) Mıǵraj túninde kózine jas alyp, ózine ilesken barlyq musylmandar úshin kóp duǵa-tilek jasady, olardy ǵafý etýdi surady.
Ardaqty Paıǵambarymyz (oǵan Allanyń salaýaty men sálemi bolsyn): «Ýa, Rabbym! Meni mıǵraj muǵjızasymen nyǵmettendirdiń. Úmmetime de osyndaı bir nyǵmet suraımyn», – dep duǵa jasaǵanda, Alla Taǵala ony: «Namaz – múminderdiń mıǵrajy», – dep qýantqan.
Alla Taǵala Mıǵraj túni men onda bolyp ótken ǵajaıyp oqıǵalardyń bereketimen ımanymyzdy baıandy etsin. Qasıetti aılar men kúnderde Jaratqan Iemiz kúnálarymyzdy keship, eki dúnıeniń baqytyn bersin. Qııamet kúni Paıǵambarymyzdyń (oǵan Allanyń salaýaty men sálemi bolsyn) shapaǵaty barshamyzǵa násip bolsyn!
Asa Meıirimdi Alla Taǵala Erejep pen Shaǵban aılarynda dúnıe jáne din isterimizge bereke berip, Ramazan aıyna aman-esen jetkizsin! Bizdiń mıǵrajymyz bolǵan namazdarymyzda elimizdiń, halqymyzdyń amandyǵyn jáne álem tynyshtyǵyn tileıik! Qasıetti Mıǵraj túnindegi qulshylyq pen duǵalarymyz qabyl bolǵaı. Ámın!
