MEShIT JAMAǴATY ARASYNDA BATA BERÝDEN SAIYS ÓTTI (FOTO)

Keshe Astana qalasyndaǵy Kóktal meshitinde «El tileýin tileıik!» atty bata berý saıysy ótti. Saıysqa Astana qalasyndaǵy 13 meshittiń jamaǵatynan iriktelingen 13 aqsaqal qatysyp, bata berýmen qatar, dinı bilimderi men salt-dástúrge jetiktigi sarapqa salyndy.

Batagóı aqsaqaldardyń arasynan jeńimpaz tańdaý tóreligi «Áziret Sultan» meshitiniń naıb ımamy Baqytjan Ótkelbaev, «Sheıh Kýnta qajy» meshitiniń bas ımamy Bekqoja Qazkenuly, Kóktal eldimekeni Aqsaqaldar alqasynyń tóraǵasy Sabyr Qusaıynovtarǵa berildi. Qazylar alqasy aqsaqaldardyń «Sálem sózdiń anasy», «Ónerli órge júzer», «Batamenen el kógerer», «Dinı suraqtar», «Salt-dástúr» atty bes kezeń boıynsha bilimderin baqylap, úzdigin anyqtaýǵa tyrysty.

Saıys qorytyndysy boıynsha júldeli III oryn «Sheıh Kýnta qajy» meshitiniń jamaǵaty Temeshbaıuly Jeńis aqsaqalǵa buıyrsa, II orynǵa «Ál-Farabı» meshitinen kelgen Qazkenuly Qajymurat aqsaqal laıyq dep tanyldy. Saıystyń bas júldesin «Áljan ana» meshitiniń jamaǵaty Baıpaqov Bolat qajy enshiledi. Júldegerlerdiń barlyǵy arnaıy «Alǵys hatpen» marapattalyp, baǵaly syılyqtarǵa ıe boldy.

Shara sońynda Kóktal meshitiniń bas ımamy Ilııas Otarovtyń uıymdastyrýymen qatysýshylarǵa merekelik dastarhan jaıyldy.

Источник: Aidos