Máýlit múbárak bolsyn!
Qadirli jamaǵat!
Barshańyzdy adamzattyń asyly, eki dúnıe sárýary ardaqty Paıǵambarymyz Muhammedtiń (oǵan Allanyń salaýaty men sálemi bolsyn) týǵan aıy – Máýlit merekesimen shyn júrekten quttyqtaımyn. Otbasyńyzǵa amandyq, myqty densaýlyq, ár shańyraqqa qut-bereke tileımin. Máýlit múbárak bolsyn!
Isi musylman balasy Paıǵambarymyzdyń (oǵan Allanyń salaýaty men sálemi bolsyn) týǵan aıyn asyǵa kútip, rýhanı basqosýlarda Allaǵa madaq, Paıǵambarǵa salaýat aıtady. Mundaı ıgi dástúr bizdiń elde de birneshe jyldan beri jalǵasyn taýyp keledi. Biz qazirgi álemdik pandemııa jaǵdaıyn eskere kele Máýlit keshin onlaın rejımde ótkizip, ıgi dástúrdi jalǵastyrýǵa sheshim qabyldadyq. Jaqsy amal jasaýǵa eshqandaı kedergi joq. Eń bastysy yqylas tanytyp, den qoısaq bolǵany.
Asyl dinimizde toılanatyn kez kelgen mereke izgilik pen qulshylyqqa, qaıyrymdylyq pen jaqsylyqqa úndeıdi. Alla elshisiniń dúnıege kelgen aıynda oryndalatyn amaldar musylman balasyn taqýalyqqa tárbıeleıdi.
Máýlit – otbasylyq mereke. Qasıetti Máýlit aıynda otbasymyzǵa ardaqty Paıǵambarymyzdyń (oǵan Allanyń salaýaty men sálemi bolsyn) ónegeli ómiri týraly nasıhat aıtyp, Alla elshisine salaýat joldap, qarııalarǵa qurmet kórsetip batasyn alý, balalarymyzdy qýanyshqa bóleý – merekeniń sáni men mánin arttyratyn saýapty amaldar.
Alla Taǵala qasıetti kitabymyz Quranda: «Allaǵa shyn máninde táýekel etip, Aqyret kúninen úmit etem deýshiler úshin jáne Jaratqandy jıi-jıi eske alatyn jandar úshin Allanyń elshisi keremet ónege bola alady» («Ál-Ahzab» súresi, 21-aıat) degen.
Rasynda, Paıǵambarymyzǵa (oǵan Allanyń salaýaty men sálemi bolsyn) laıyqty úmbet bolýǵa umtylǵan musylman úshin onyń ómirinen alar ónegeler kóp. Sonyń biri – meıirimdilik. Bul týraly Quranda: «(Ýa, Muhammed) Biz seni búkil álemge raqym etip jiberdik» («Ánbııa» súresi, 107-aıat) dep baıandalǵan. Bir sahaba Alla elshisinen din dushpandaryna teris duǵa jasaýdy suraǵanda: «Men laǵynet etýshi emes, raqym etýshimin» dese, taǵy birde: «Men búkil álemge raqym, taqýa jandarǵa hıdaıat etip jiberilgenmin» degen ósıetin qaldyrǵan.
Paıǵambar jolyn ustanǵan musylman qashan da aınalasyna meırim tanytyp, shýaǵyn shashyp júredi. Bes kúndik ótkinshi ómirde bir-birimizdiń kóńilimizge qaıaý túsirmeı, kerisinshe jyly sózimizdi arnap, jylýlyq syılap, aǵaıyn-týys baýyrlarǵa, barsha adamǵa syrttaı duǵa jasap, tileýlestik nıetimizdi bildirip júreıik. Qoldan kelse kómegimizdi aıamaıyq.
Qadirli baýyrlar! Máýlit múbárak bolsyn! Osy qasıetti aıda barynsha saýapty isterge den qoıyp, qulshylyq jasap, Allanyń razylyǵyn alýǵa asyǵaıyq. Ásirese, Haq elshisine kóbirek salaýat joldaýdy umytpaıyq.
Alla Taǵala barshamyzdy qaýipti indetten saqtap, elimizge amandyq, jerimizge tynyshtyq, halqymyzǵa baq-bereke násip etkeı. Ámın!
Naýryzbaı qajy TAǴANULY
Qazaqstan musylmandary dinı basqarmasynyń tóraǵasy, Bas múftı
