KIShI QAJYLYQTAN ORALǴAN MEShIT JAMAǴATYNA QURMET KÓRSETILDI (FOTO)

Búgin, qasıetti juma kúni Astana qalasyndaǵy «Áziret Sultan» meshitinde kishi qajylyq saparynan oralǵan Sansyzbaı Tókenulyna jamaǵat aldynda qurmet kórsetildi. Meshit bas ımamy Erbolat Júsipov jıylǵan kópshilikke aqsaqaldy tanystyryp ótip, qazaqy dástúrimizge saı ıyǵyna shapan japty.

Aıta keteıik, jaqynda ǵana ótken «Úmmetin súıgen Muhammed» atty Máýlit keshinde QMDB Astana ókildigi sahna tórinde birneshe janǵa «Máýlit syılyǵyn» tabystaǵan bolatyn. Solardyń biri – «meshit qusyna» aınalǵan, «Áziret Sultan» meshitiniń turaqty jamaǵaty Sansyzbaı Tókenulyna kishi qajylyq joldamasyn tartý etken edi.

Allanyń qalaýymen qasıetti saparǵa aman-esen baryp kelgen Sansyzbaı aqsaqalǵa búgin osylaısha jamaǵat aldynda qurmet kórsetilip, jamaǵatpen birge duǵa jasaldy.