Hıdjabtaǵy polıtsııa bastyǵynyń sýreti úndi ultshyldarynyń qytyǵyna tıdi

Úndistan eliniń áleýmettik jelileriniń birinde paıda bolǵan bul sýret jergilikti ındýs ultshyldarynyń ashýyn keltirip, qoǵamdyq pikir tolqýyn týǵyzdy. Maharashtra shtatynyń polıtsııa bólimshesi bastyǵynyń ornyna appaq hıdjabtaǵy jap-jas musylman qyz otyryp, polıtsııa qyzmetkerleri ony qorshaı sýretke túsken.

Keıbir jandar bul oqıǵany «tarıhı sýret» dep baǵalap, óz tileýlestigin bildirip jatsa, ındýızm dinin ustanatyn ultshyldar úshin «jer astynan jik shyqqandaı» boldy. Tipti, olar máseleniń mán-jaıyn anyqtamaq bolyp, atalmysh shtat basshylaryna habarlasqan kórinedi.

Tekserý nátıjesinde belgili bolǵandaı, atalmysh sýret 8 naýryz – Halyqaralyq áıelder kúninde túsirilgen eken. Býldhana aımaǵy basshylarynyń bastamasymen sol kúni mektep oqýshylaryna salyq komıteti men polıtsııa qyzmetkerleriniń rólin oınaýǵa ruqsat berilgen kórinedi. Osylaısha, 14 jastaǵy Sahrısh Kanval polıtsııa bólimshesiniń bastyǵy bolyp sýretke túsken.