Iordanııada Astana kóshesi paıda boldy

Elorda ákimi Baqyt Sultanov resmı saparymen Iordanııa astanasy Ammanǵa bardy. Bul týraly Astana ákimdiginiń saıty habarlady.

Keshe Iordanııa astanasy kósheleriniń birine Qazaqstannyń elordasy — Astana ataýy berildi. Kósheni ashý saltanatyna Qazaqstan astanasynyń ákimi Baqyt Sultanov pen Iordanııanyń bas qalasy Ammannyń mEri Iýsýf ál-Shaýarıba qatysty. Astana ákimi Baqyt Sultanov Qazaqstan Prezıdenti Nursultan Nazarbaev pen Iordanııa koroli II Abdolla arasyndaǵy dostyq qarym-qatynastyń ózgelerge úlgi ekendigin, eki eldiń múddesi úshin qyzmet etetinin tilge tıek etti. Ol ammandyqtarǵa Elbasymyzdyń qyzmetine degen yqylasy úshin óz alǵysyn bildirdi.

Eske sala ketsek, 2010 jyly Iordanııa astanasyndaǵy ortalyq kóshelerdiń birine Nursultan Nazarbaevtyń esimi berilgen bolatyn.

«Biz barsha ammandyqtarǵa bizdiń Elbasyǵa kórsetken qurmeti úshin óz alǵysymyzdy aıtamyz. Jańa ǵana joǵary mártebeli Shaýarıba myrzamen birge Nursultan Nazarbaev atyndaǵy kóshede bolyp, onyń damýyn kórip qaıttyq. Al endi Qazaqstan astanasynyń atymen atalatyn kósheni ashyp otyrmyz. Bul oqıǵa jas Astananyń 20 jyldyǵy toılanyp jatqan jyly oryn alyp otyr. Ol bizdiń qalalar men elderdiń turǵyndary arasyndaǵy qarym-qatynastyń nyǵaıa túsýine jańa ımpýls beretindigine senimdimin» dedi B. Sultanov.