III aımaqtyq ımamdar forýmynyń úndeýi qabyldandy (FOTO)
QMDB Nur-Sultan qalasy ókildiginiń uıymdastyrýymen «Rýhanı qundylyqtar – qoǵam birliginiń negizi» atty III aımaqtyq ımamdar forýmyyf qatysýshylardyń Úndeýi jarııalandy. Úndeý mátinin QMDB Apparat basshysy Ǵylymbek Jádigeruly oqyp berdi. Úndeý mátini tómendegideı:
Biz, Nur-Sultan qalasynyń dinı qyzmetkerleri, memleket jáne qoǵam qaıratkerleri, «Rýhanı qundylyqtar – qoǵam birliginiń negizi» III aımaqtyq ımamdar forýmynyń qatysýshylary, Qazaqstan musylmandarynyń rýhanı tuǵyrnamasy «Jeti rýhanı qazyq» qujatyn basshylyqqa ala otyryp, Elorda turǵyndaryn týralyqqa, otansúıgishtikke, eńbekqorlyqqa, birlikke, mádenıettilikke, ımandylyqqa, bilim-ǵylymǵa úndeımiz!
Búginde óziniń qonaqjaı qalpymen, ómirsheń saltymen tórtkúl álemge tanylǵan jas Otanymyzdyń júregi – Nur-Sultan qalasy. Júzdegen ult pen ulysty baýyryna basyp, túrli din ókilderin teńdeı terbetken altyn besik desek artyq aıtpaımyz. Sondyqtan da, egemendi elimizdiń damýshy kelbeti, asqaqtaǵan sáýleti men dáýleti, rýhanı baılyǵy men ulttyq qundylyqtary eń áýeli Elorda turǵyndarynyń boıynan kórinis tabýy tıis.
Tuǵyrnama musylmannyń tulaboıynda tabylýy tıis negizgi jeti kórkem sıpatty qamtıdy. Atap aıtqanda, ımandylyq, otanshyl bolý, bilim alý, birlikke bolysý, eńbekqorlyq, mádenıetti bolý jáne ádildik prıntsıpin ustaný. Bul – adam balasynyń kisilik kelbetin, kórkem minezin qalyptastyrýǵa negiz bolatyn jeti rýhanı qazyq. Osy qasıetterdi ómirimizge tirek ete otyryp, óskeleń urpaq tárbıesiniń basty ustyndary etip qalyptastyrý el bolashaǵyna jasalǵan kútim.
Aqıqatynda, musylman balasy ádilettiń aq jolynan taımaı, meıirimdiliktiń shoǵyn mazdatyp, aǵaıyn-týysqa qamqorlyqpen qaraılasyp, jamandyq ataýlyǵa qarsy tursa, kórkem minezimen qoǵamǵa nuryn shashyp, qyzmet etse, sóz joq – úlken ǵanıbet! Osy turǵydan alyp qaraıtyn bolsaq, musylman úmbeti qarańǵylyqtyń perdesin serpip tastaıtyn – aǵartýshy, Otan úshin janyn pıda etip, otqa kúıýge daıar – janqııar, kópshiliktiń ıgiligi úshin qam jeıtin – qaıratker, qara basynan qalyń buqaranyń múddesin joǵary qoıatyn – qamqor, shıelenisken jáıtterdiń kúrmeýin aǵytatyn – mámileger, qaı iste bolmasyn qara qyldy qaq jaratyn – ádiletti, óz isiniń jiligin shaǵyp, maıyn ishken – maıtalman, boıyna ónege tunǵan – tálimger bolýy tıis.
Osy oraıda, Biz – III aımaqtyq ımamdar forýmynyń qatysýshylary, barsha otandastarymyzdy, onyń Nur-Sultan qalasynyń turǵyndaryn «Rýhanı jeti qazyq» qujatyna qarap boı túzep, izgi qala, izgi qoǵam qalyptastyrýǵa úndeımiz!
Nur-Sultan qalasy, 12 qarasha, 2019 jyl
