Elordada «Tulǵasy bıik tálimger» atty Máýlit keshi ótti (FOTO+VIDEO)
Keshe Elorda tórinde QMDB Nur-Sultan ókildiginiń uıymdastyrýymen «Tulǵasy bıik tálimger» atty Máýlit keshi bolyp ótti. Elimizdiń irgeli oqý oryndarynyń biri Eýrazııa Ulttyq ýnıversıtetiniń qoldaýymen ótken sharaǵa oqý ordasynyń shákirtteri men ustazdar qaýymy qatysyp, ardaqty Alla Elshisiniń (s.ǵ.s.) ónegeli ómirimen jaqyn tanysa tústi.
Shara shymyldyǵy Muhammed (s.ǵ.s.) paıǵambarymyzdyń ómirinen syr shertetin Máýlit jyrymen bastalyp, áserlengen kórermenniń oryndarynan tik turyp salaýat aıtýymen ashyldy. Rýhanı sharaǵa arnaıy qatysqan QMDB tóraǵasy, Bas múftı Naýryzbaı qajy Taǵanuly barsha qatysýshylardy Máýlit merekesimen quttyqtap, Alla Elshisiniń (s.ǵ.s.) ǵıbratty ǵumyrynan mysaldar keltire otyryp, taǵylymdy nasıhat jetkizdi. Sondaı-aq, belgili akademık Ǵarıfolla Esim men «Nur Múbárak» ýnıversıtetiniń prorektory, QMDB Ǵulamalar keńesiniń múshesi Qaırat Qurmanbaev aǵalarymyz da jastarǵa Muhammed paıǵambar (s.ǵ.s.) jaıly qundy maǵlumattar aıtyp, rýhanı keshtiń salmaǵyn arttyra tústi.
Eki dúnıe sardaryna (s.ǵ.s.) degen saǵynysh bul kúni sahna tórinde salaýat bolyp aıtylyp, aqyndarymyzdyń tilinde jyr bolyp órilip, termeshi-kúıshi ónerpazdardyń dombyrasynan tasqyndaı quıyldy. Sondaı-aq, Jiger Aýypbaev pen Serjanáli Álibek syndy belgili ánshiler de Máýlit sharasyna óz úlesterin qosyp, kórermendi rýhanı ánderimen qýanta tústi.
Shara aıasynda osy oqý ordasynda bilim alyp jatqan shákirtter arasynan top jaryp, jastyq jalyny men altyn ýaqytyn oqyp-bilýge, izdenýge arnaǵan 5 bilimpaz stýdentke arnaıy «Máýlit syıy» berilip, kórermen aldynda arnaıy qurmetpen marapattaldy. Naıb múftı Ershat Aǵybaıuly men akademık Ǵarıfolla Esim stýdentterge syılyqty óz qoldarymen tabystap, izgi tilekterin bildirdi.
Oqý ordasy qabyrǵasynda alǵash ret ótkizilgen Máýlit sharasy kórermen qaýymyna erekshe áser qaldyryp, tanym kókjıekterin keńeıte túsken kesh boldy. Bul jaıynda Eýrazııa Ulttyq ýnıversıtetiniń prorektory, akamdemık Dıhan Qamzabekuly da óz sózinde qýattaı kele, Máýlit keshiniń mańyzdylyǵyn erekshe atap ótti.
Rýhanı sharaǵa qala ákimi Altaı Seıdiruly da aıryqsha qurmet kórsetip, Muhammed (s.ǵ.s.) paıǵambarymyz týylǵan Máýlit merekesimen quttyqtaý hatyn joldady. Shahar ákiminiń izgi lebizin Din isteri basqarmasynyń basshysy Nurdáýlet Imanáliuly oqyp berip, barsha kórermenderdi máýlit merekesimen quttyqtady.
Sýretter toptamasyn «FOTOGALEREIa» aıdarynan kóre alasyzdar!
