Elordada «Salaýatty jamaǵat» atty sporttyq saıys ótti (FOTO+VIDEO)

Búgin Nur-Sultan qalasy meshitteri arasynda «Salaýatty jamaǵat» atty sporttyq saıys bolyp ótti. «Sádýaqas Ǵylmanı» meshitiniń uıymdastyrýymen ótken dúbirli dodaǵa Bas qaladaǵy 12 meshittiń jamaǵatynan quralǵan 12 komanda qatysyp, ulttyq sport túrlerinen kúsh talastyrdy.

QMDB jumys baǵytynyń biri – «Din men dástúr» salasy aıasynda ótken sporttyq saıysta qatysýshylar «Asyq», «Qol kúres», «Gir kóterý» jáne «Arqan tartys» oıyndary boıynsha baq talastyryp, jekeleı jáne toptyq marapattaýlarǵa ıe boldy. Sondaı-aq, qatysýshy komandalar aqtyq saıys aldynda óz ónerlerin ortaǵa salyp, sporttyq trıýkter de kórsetti.

Sport saıysynyń ashylý saltanatyna naıb múftı Ershat Ońǵar, shahar bas ımamy Erbolat Júsipov arnaıy qatysyp, izgi tilekterin bildirdi. Jamaǵat birligin arttyryp, salaýatty ómir saltyn nasıhattaýǵa baǵyttalǵan búgingi saıystyń mańyzdylyǵyn atap ótip, komandalarǵa sáttilik tiledi.

Dinı basqarma ǵımaratyndaǵy sport zalda ótken dúbirli saıys jankúıerler men kórermender úshin tartysqa toly ótti. Zal ishin jańǵyrtqan qoshemet-qolpashtaýlar, namysty janyǵan qaıraý sózder, jigitterdiń kúsh-qaıratyna rıza bolǵan jankúıerlerdiń súısingen lebizderi – búgingi saıystyń joǵary deńgeıde ótkeniniń belgisindeı boldy.

Tartysqa toly ótken saıys nátıjesi boıynsha komandalyq esepte «Raısa ana» meshitiniń jamaǵaty III orynǵa ıe bolsa, «Nur Astana» meshiti II orynǵa kóterildi. Sporttyq saıystyń bas júldesin «Tólebaı» meshitiniń jamaǵatynan quralǵan «Suńqar» toby ıelendi.

Sýretter toptamasyn «FOTOGALEREIa» aıdarynan kóre alasyzdar!