Elordada múmkindigi shekteýli balalarǵa merekelik dastarhan jaıyldy (FOTO)

Búgin QMDB Nur-Sultan qalasy ókildiginiń uıytqy bolýymen Áz-Naýryz meıramyna oraı múmkindigi shekteýli búldirshinderge merekelik dastarhan jaıylyp, qýanyshqa toly shara ótti. Merekelik keshke Nur-Sultan qalasy ákimdiginiń «Jansaıa» áleýmettik qyzmet kórsetý ortalyǵynda tirkeýde turǵan 100 búldirshin men olardyń ata-analary shaqyrylyp, qurmetti qonaq boldy.

Qasıetti Quran aıattarymen ashylǵan shara barysynda qazaqy qara dombyra kúmbirlep, án men kúıden shashý shashyldy. Aq dastarhan basynda alqaqotan bas qosyp, kóńildi keshtiń shýaǵyn sezingen búldirshinder de, ata-analar qaýymy da qosyla án shyrqap, máre-sáre kúı keshti.

Qaıyrymdylyq sharasyna Nur-Sultan qalasynyń bas ımamy Erbolat Júsipov, Din isteri basqarmasynyń basshysy Nurdáýlet Álmuqanov jáne demeýshi azamattar da arnaıy qatysyp, ózderiniń izgi tilekterin bildirdi.

Shara aıasynda qazaqy salt-dástúrimiz de jańǵyryp, el aǵalary kishkentaı búldirshinniń tusaýkeser rásimin ótkizdi. Táı-táılaǵan kishkentaı búldirshinniń alǵashqy qadamyna kýá bolyp, aǵalar aq batasyn arnady.

Shara sońynda osyndaı merekelik kóńil-kúı syılap, balalar kóńiline qýanysh sepken QMDB Nur-Sultan ókildigine ortalyq qyzmetkerleri alǵys bildirip, Bas ımam Erbolat Nuryldauly men «Zeket jáne qaıyrymdylyq» qorynyń Nur-Sultan ókildigi boıynsha jaýapty qyzmetkeri Mereı Jaqııaǵa «Alǵys hat» tabystady.

Sýretterdi «FOTOGALEREIa» aıdarynan kóre alasyzdar!