ELORDADA III RESPÝBLIKALYQ «QAIYRYMDYLYQ JARSHYLARY» ERIKTILER FORÝMY ÓTTI (FOTO)
Búgin elordada Qazaqstan musylmandary dinı basqarmasyna qarasty «Zeket jáne qaıyrymdylyq» qorynyń uıymdastyrýymen «QAIYRYMDYLYQ JARSHYLARY» III respýblıkalyq eriktiler forýmy ótti.
Forým jumysyna QMDB Tóraǵasy, Bas múftı Naýryzbaı qajy Taǵanuly bastaǵan múftııat ujymy men din qyzmetkerleri, BAQ ókilderi, sondaı-aq «Zeket jáne qaıyrymdylyq» qorynyń óńirlerdegi ókilderi men eriktiler qatysty.
Jıynda alǵysóz sóılegen Bas múftı: «Halqymyzda aǵaıynnyń aýyrtpalyǵyn eńserýge bel sheship kirisip ketý, muqtaj jandarǵa qol ushyn sozý, ómir súrip otyrǵan ortańa, qoǵamǵa paıdańdy tıgizý – qanymyzǵa sińgen ıgi qasıettiń biri. Halqymyz «Jylýy joq úıden bez, qaıyrymy joq bıden bez» deıdi. Rasynda qaıyrymdylyq jasaý ár adamnyń qolynan kele bermeıtin is. Jomart bolý – ózińde bardy zárý adammen shyn júrekten bólisý.
Prezıdentimiz qadirli Qasym-Jomart Kemeluly aıtqandaı, «Shyn máninde jany taza adam ǵana volonter bola alady. Eriktiler – ózgeniń máselesin óz isindeı kóretin júregi keń, nıeti durys jandar. Bizdiń elimiz dál osyndaı azamattardan kende emes». Allaǵa shúkir, bizdiń aramyzda da qaıyrymdylyq, adamgershilik qasıetterdi tý etken, ózgelerge janashyrlyq peıilderin tanytyp júrgen jandar az emes. Bul bizdi qýantady. Biz sizderdi árqashan maqtan tutamyz.
Qara shańyraǵymyz – Qazaqstan musylmandary dinı basqarmasy qoǵamdyq ıgi isterden shet qalmaı, meniń tapsyrmam boıynsha 2022 jyly «Zeket jáne qaıyrymdylyq» qory janynan «Qaıyrymdylyq jarshylary» toby qurylǵan edi. Sodan beri eriktilerimiz elimizdiń ár óńirinde qaıyrymdylyq sharalaryna belsendi túrde atsalysyp keledi. Alla razy bolsyn! El basyna kún týǵan qıyn-qystaý sátterde ortaq iske jumylǵan sizderge taǵy da ózimniń jáne Qazaqstan musylmandary dinı basqarmasy atynan aıryqsha alǵysymdy bildiremin» dedi.
Sondaı-aq forýmda QMDB Tóraǵasy bıyl kóktemdegi sý tasqyny kezinde turǵyndarǵa járdemshi bolǵan «QAIYRYMDYLYQ JARSHYLARY» eriktilerin, zeket ókilderin alǵys hatpen marapattady.
